Leai se Faamaoniga o Tuuaiga Faasaga i Malu o le Malo lea sa Faamalolo Lē Tumau

"Ua maea suesuega e le faamaoniaina tuuaiga.."

0
466

O Malu o le Malo na faamalolo le tumau mai a latou galuega, ua toe taliu nei e faatino lo latou valaauina ina ua maea suesuega e lē faavaea ni tuuaiga na faasaga ia i latou.

O le tali mai lea a le afioga i le Komesina o Leoleo Auapaau Logoitino Filipo ina ua fesiligia e le Samoa Global News.

O le amataga o le tausaga sa faamalolo lē tumau ai ni alii leoleo se toatolu ma se tamaitai e toatasi ae sei faagasolo suesuega a le PSU (Professional Standards Unit).

Sa galulue uma i latou i le tofiga o le Constable ma galulue i le vaega o ofisa suesue faapitoa a le matagaluega, le CID (criminal investigation unit).

Sa faia se loia a nei leoleo e tula’i mo i latou ina ua tuuina mai le faaiuga a le Matagaluega, ona sa tumau pea lo latou mau e tuuai sese i latou, ina ua lipotia e se isi alii leoleo tuuaiga e faasaga i fesootaiga ma fualaau faasaina.

Saunoa le Komesina o Leoleo, “Ua maea suesuega, e leai se faamaoniga o tuuaiga sa faasaga ia i latou.”

O totogi foi o Malu o le Malo sa faamalolo le tumau, e tatau ona toe maua uma.

Saunoa Auapaau, “I suesuega na faatinoina, na faamaonia ai le iai o a latou sootaga ia i latou na taofia mai e leoleo i se osofaiga i Malifa, peitai, e lē o iai se faamaoniga o loo latou fa’aogaina fualaau faasaina.”

Saunoa Auapaau e le o toe foi i latou  i le vaega suesue o le CID sa galulue ai, ae ua tuuina atu latou i nisi o auaunaga i totonu lava o le matagaluega e tautua ai.

E le’i manino poo a aiaiga o faamaoniga (evidence) e tatau ona ausia ae lei faamalolo le tumau ni leoleo, ae poo lea fo’i se tali atu a le Matagaluega pe afai sa tuuai sese nisi.