Leai ni Mataupu Ogaoga na Tulai Mai i le Vaiaso o Aso Malolo mo Tamaiti

0
26

E lei iai ni mataupu ogaoga na alia’e mai i le faaiuga o le vaiaso ao alo atu le faamanatuina o le Aso Sa a le fanau, seia vagana ai nai vaega laiti sa mafai ona oo atu iai Alii Malu o le Malo.

O le saunoaga lea a le Sui Komesina o le Matagaluega a Leoleo le Susuga Papalii Monalisa Tiai Keti.

Saunoa Papalii, “E tusa ai ma faamaumauga a le matagaluega i le faaiuga o le vaiaso ma le aso malolo (long week end) mai le Aso Faraile seia oo mai le Aso Gafua, sa leai ni vevesiga e pei ona maitauina i aso malolo faapenei.

“E 146 mataupu na tali atu iai leoleo. Mai lea fuainumera, o loo faamauina, sa maualuga ai mataupu tau taavale afi, (traffic) lona lua ai loa mataupu lautele na moomia ai le fesoasoani a leoleo.”

Na saunoa foi Papalii, o loo faamauina, o le ofisa leoleo i Faleolo sa numera muamua i le tele o mataupu na valaau mai totonu, lea foi sa tali atu iai leoleo.

Lona lua le ofisa leoleo i Faleata ae lona tolu iai le ofisa leoleo i Vaitoomuli Palauli.

Sa saunoa Papalii, sa mafai ona tali atu ai le matagaluega i nei valaau uma.

Ae na saunoa manino Papalii, o lona aotelega e foliga mai na lelei le alo atu o le atunuu e faamanatu le Aso Sa faapitoa mo le fanau.

“E leai ni mataupu ogaoga pe a faatusatusa atu i le tausaga talu ai 2021, e 220 mataupu sa faamauina na tali atu iai le matagaluega”.

O le isi vaega na saunoa iai Papalii, o valaau na agai mai i totonu o ofisa leoleo mo se fesoasoani, o loo numera muamua ai le gaoi, sosoo ai le lafo upu masoa ma le faalumaluma e lepetia ai le nofo lelei, (insulting words, disturbing the peace) sosoo ai lea ma le faaoolima.

“O mataupu nei e tolu o loo faamauina sa agai mai ai valaau mo se fesoasoani.”