I se faasilasilaga a le Faalapotopotoga o Vaa a Samoa (Samoa Shipping Corporation) sa faapea mai ai o le a lē tuu taimia faigamalaga i le vā o Upolu ma Savaii ona o uiga loulouā o le tau o loo aafia ai nei le atunuu.
“E faailoa atu i le mamalu o le atunuu femalagaai i le va o Mulifanua ma Salelologa o le a lē tuu taimia tatou faigāmalaga i le asõ, Aso Toonai 7 Ianuari 2023 ma e ono iai suiga ma e fuafuaina lava malaga i le tala o le tau.”
Ua fa’afetaia e le pulega o le faalapotopotoga le finagalo malamalama a le mamalu o le atunuu, ae o le faamuamua lava ma le faatauaina o le saogalemu.
“Mo nisi faamatalaga fa’afesootai mai le Ofisa Autu 20935/20936.”
I se lipoti a le Ofisa o le Vaai-Tau a Samoa na tuuina mai i le 5 i le vavevao analeila (Aso Toonai 7 Ianuari) o loo tuuina mai ai lapata’iga mo timuga mamafa, lologa ma savili malolosi.
“O timuga mamafa e faa’umi’umiloa fa’apea savili e fa’asolo ina malolōsi le fa’ata’uta’u o lo’o a’afia ai pea Samoa ma e āfua mai i se vaega fa’atupula’ia o savili ma timuga o lo’o tumau pea i luga o le atunu’u..
“O nei uiga loulouā o le tau e fa’amoemoe o le ‘a tumau pea ona a’afia ai le atunu’u mo le asō ma maualuga ai pea le mā’ale’ale o nofoaga e a’afia-gōfie i lōlōga ma ele’ele solo..
“O savili malolosi e pei ona tāua i luga e ono fa’atupula’ia ai pea le maualulūga o galu ma āuma i ‘ogasami uma o Samoa. O lea, o lo’o fa’amalosia pea Lapata’iga o Timuga Mamafa, Lapata’iga o Lōlōga, Lapata’iga mo ‘Ogasami ma le Fautuaga mo Savili Malolosi.”
