Ua teena e le Faamasinoga le tatalaina i tua o se alii o loo tuuaia i lona faaaogaina o se agaese e taumafai ai e faaoo le oti i se tamaititi 10 tausaga ma lona uso è 17 tausaga.
O Ale Fogaa, 34 tausaga mai Amaile ua teena e le itu a leoleo le talosaga a le alii loia o Afoa Fetu Lagaaia mo se avanoa e tatala ai i tua.
I taualumaga o le faamasinoga maualuga i le amataga o le vaiaso nei, sa teena uma ai e Ale Fogaa moliaga a le itu o leoleo e aofia ai le taumafai e faaoo le oti (attempted murder) faaoo man’ua tugā (grevious bodily harm) ma le uumia o se aupega matautia (armed with a dangerous weapon).
O le masina ua mavae na tulai mai ai se faalavelave i le afioaga o Amaile, lea e tuuaia ai Ale Fogaa i le faaoolima i tamaiti e 10 ma le 17 tausaga le matutua.
O faamaumauga a leoleo e faapea sa faaaoga ai se agaese, ma e ogaoga manu’aga sa oo i le fanau. Sa auina atu ai mo togafitiga i le falemai i Motootua.
I le valaauina muamua o lenei mataupu na talosaga ai le tinā o Ale mo se avanoa e tatala ai o ia i tua, ona e leai se isi e faamoemoe iai le tausiga o le aiga.
Na fesiligia e Fepuleai Ameperosa Roma pe ua fai se faaleleiga ae na tali le tinā ua ma’ea ona matou oo i le aiga o fanau ma faatino le faatoesega.
Sa saunoa mai le tina, ua ma’ea foi ona fai le latou sala i le nuu.
Peitai, na tulai le tuaā o fanau na aafia ma faailoa i le Faamasinoga, e alu atu le faatoesega e le o iai nisi o le aiga.
Saunoa le tamā, “Na o lo’u tinā matua sa iai i le fale, ou te le’i iai ma e le’i faia foi se matou tala.”
Na talosagaina e le tamā o le fanau sa aafia le Faamasinoga, ina ia loka pea Ale Fogaa, ona o loo ma’ale’ale le mataupu ua masa’a le toto o le fanau.
O lea la o loo faaauau ai pea ona nofo taofia i le vaavaiga a leoleo Ale ae ua faatulaga e le Faamasinoga le Aso 8 Aukuso e iloiloina ai le talosaga a Ale na tauala mai i lana loia mo se avanoa e tatala ai o ia i tua (bail hearing).
Ua faatulaga foi le Aso 2 Mati 2026 e suesue ai mau o lenei mataupu.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
