Sāili Matai Fagasa Sataua e fia Malamalama i Tulafono Taufaaofi

E taua lo matou malamalama, ina ia o atu le ofisa e talanoa atu e uiga i le mataupu lenei a'o la e iai tali e tatau ona tali mai ai le itumalo, ona e le'o afio atu le faipule e avatu ma talanoa atu e uiga i tulafono ia e tolu;

0
405
Faavae Siaki Crichton, Lafai Lapatagata Falekomiti (SN) and Samu Sekoneferenisi (matai)

 

E to’atolu matai mai le afioaga o Fagasa Sataua i Savaii na malaga mai i le va’a ma o’o atu i le Ofisa o le Fono Faitulafono i le Maota o Tofilau Eti Alesana, i le fia maua o ni kopi o tulafono taufa’aofi lea o lo’o fa’agasolo iai le galuega a le Komiti Fa’apalemene i le taimi nei.

Sa malaga mai le Afioga ia Faavae Siaki Crichton ma le Sui o le Nuu (SN) ia Lafai Lapatagata Falekomiti faapea ma le matai o le nuu ia Samu Sekoneferenisi.

Sa latou maua le faamatalaga i tulafono nei e tolu i luga o polokalame a Asosi a Loia i le TV, ma ua faapopoleina i latou i le faamatalaina e alii ma tamaitai loia o suiga fou o loo fuafuaina.

Sa fai ai loa le tonu i lo latou afioaga, e tatau ona o’o mai i latou nei, e avatu ni kopi o nei tulafono. O le auga ona e lei silafia e i latou nei tulafono ma e fia malamalama foi i ni aafiaga.

Sa saunoa mai Faavae Siaki, “E le’i iai se feiloaiga a lo matou Faipule ma lo matou nu’u e uiga i le mataupu lea i pili ia e tolu, ae sa matou vaaia lava i luga o le TV o loo faatalatalanoa atu ai loia o le atunuu e uiga i le mataupu lea”.

Faavae Siaki

O le latou tala o latou o sui o le Afioaga o Fagasa, e latou te teena le upu faapea, o le finagalo o le Sui Faipule, o le leo foi lena o le nuu poo le itumalo.

“O le finagalo o le Faipule e faalagolago i le tofa i Alii ma Faipule o le nuu e aumai ai le mea amiotonu, aemaise o mea e finagalo iai le itumalo;

“Ae mo le taimi nei e le’i oo atu lo matou Faipule, e avatu iai se finagalo o le nu’u e uiga i tulafono ia, ae pei o lea maua atu faasalalauga i le TV, ia o le puipuiga o le matou nuu, ona o lea e pei e iai mataupu e uiga i matai, ma ‘ele’ele.”

O le Sui Faipule o Vaisigano II o le Afioga ia Tapulesatele Mauteni Tamasone Metuli II Esera.

Tapulesatele Mauteni Tamasone Metuli II Esera.

Sa saunoa Faavae Siaki e tusa ai ma le faamalamalamaga a nisi o loia o le atunuu i luga o le TV, e latou te teena le tulaga lea a faapea ai, a lē mafai ona tapena ni nofo a se aiga, pe a lē o iai le Sui o le Nuu,

“O le mea lea e faapea ai e le taunuu lava ona fai ni na nofo seiloga lava e iai le pulenuu, ma saini, faatoa fai se nofo poo ni nofo fo’i.”

E talitonu matai mai Fagasa ua tuai ona faataoto le polokalame e faamalamalama ai nei tulafono i totonu o lo latou nuu ma le itumalo. Ae latou te lagolagoina le avatu o ni polokalame e faamalamalama ai nei tulafono i Savaii.

O loo faapea mai fo’i Faavae e taua le malamalama o le nu’u, aua o lea la o le a o atu i Savaii le Komiti a le Palemene mo ni finagalo o afioaga, peitai e leai ma se isi o latou o malamalama i tulafono nei.

“E taua lo matou malamalama, ina ia o atu le ofisa e talanoa atu e uiga i le mataupu lenei a’o la e iai tali e tatau ona tali mai ai le itumalo, ona e le’o afio atu le faipule e avatu ma talanoa atu e uiga i tulafono ia e tolu;

“Ae pei o le agaga lava o lea ua vaai atu ua ta a’e lava le taimi, ua ala ai na matou omai ma nai toeaiina ia – e avatu ni a matou kopi o tulafono sei o matou malamalama ai i tulafono nei.”

Faavae Siaki Crichton (matai), Lafai Lapatagata Falekomiti (pulenu’u) ma Samu Sekoneferenisi (matai)

Maina Vai