Le Mafai Ona Tauva se Tinā ona o Tulafono o Faigapalota

0
5896

Ua punitia le faamoemoe ma le aiā tatau o se tasi o tinā sa fuafua e fia tauva mo le faigapalota Vaimauga #3 lea o le a faatino e le Komesina o Faigapalota i le masina o Fepuari.

O Tupuola Theresa Finau, o se tinā 48 ona tausaga, ua ia faailoa lona lē mafai ona tauva mo le sailiga o se tofi o lona Itumalo o Vaimauga numera 3.

Saunoa Tupuola, o ia ua silia ma le 16 tausaga o nofo i Malololelei, o se tasi o nuu o le Itumalo o Vaimauga 3. Ua leva foi tausaga o resitalaina lona suafa i le lola palota a Vaimauga 3, ona o le Itumalo o loo ia aumau ai.

Saunoa Tupuola, o loo fai foi lana monotaga i le Ekalesia Katoliko le Divine Mercy i Malololelei.

Ae o le faafitauli, e ui o ia o le matai Samoa, e lē o iai sona suafa matai resilataina i totonu o le Itumalo.

O loo matai nei o ia i le suafa Tupuola mai le afioaga o Siumu. Sa taumafai e nanau mai le aupolapola e faa’aoga ai lona matai i totonu o le Itumalo, peitai, e lē mafai ona o Malololelei, e lē o se nuu mavae.

Sa fesiligia sona finagalo poo fea le itu poo le pati se manu e tauva ai, ae na ia saunoa, o ia sa fuafua e tamoe lalo le fua tutoatasi (Independent MP).

Saunoa Tupuola, o tulafono o faigapalota, lea ua aafia ai lona aia tatau e tauva i le filifiliga.

“O se faanoanoaga tele lava lea, ona ua punitia lona aia tatau.”

I le lē mafai ai ona tauva Tupuola, ua ia aumai ai sana tuualalo i le itupa o tina.

“Tulai mai so tatou sui e tauva i le faigapalota o loma nei mo le sailia o se tofi o le Itumalo..”

Ae le gata i lea ua ia aumai foi sona finagalo faamananuia mo le faamoemoe o le itumalo o loo loma nei.

O le afioga ia Tupuola o se tinā faipisini, e na te faafoeina le auaunaga o le Finau Exports, e auina atu ai container o fua o faatoaga, atoa ai ma oloa tau taumafa i atunuu i fafo. E faapena foi ona faaulufaleina mai i totonu o le atunuu nisi o oloa.

Sa ia tā’ua foi, o ia sa galue o se failautusi mo le Susuga ia Ve’atauia Faatasi Puleiata, lea sa tauva i lalo o le fu’a le Fast i le palota tele na sei mavae atu nei.

Ua sauni nei le Ofisa o Faigapalota mo se aso o le masina o Fepuari e toe sailia ai se tofi o Vaimauga 3 lea o loo avanoa ina ua tuumalo le Afioga ia Tapunu’u Papalii Niko Lee Hang.