Lē fa’ataunu’uina le fa’atautoina o le tofa ia Namulauulu Sami Leota

0
294

29 Me 2019, Apia Samoa. O le taualumaga o le Palemene i le taeao ananafi sa atofaina e fa’ataunuuina ai le fa’atautoina o le tofa ia Namulauulu Sami Leota.

Ae peitai sa le mafai ona fa’ataunuuina lea faamoemoe ona o lo’o auai atu le tofa i nisi o fonotaga a le Iuni Lakapi a Samoa o lo’o faia i Fiti.

Sa ta’ua e le Fofoga Fetalai, Toleafoa Faafisi sa fa’aoo atu le faanoi a le tofa ia Namulauulu o le a le mafai ona auai i le Palemene i le taeao nei ona o ni faiga filifiliga mo se Peresetene i le itulagi i Ausetalia ma le pasefika.

“Ua talia e le Fofoga Fetalai le faanoi a le tofa ia Namulauulu Sami Leota e auai atu e fai ma sui o Samoa ma le atunuu i faagamaea a le Iuni Lakapi a le itulagi i Ausetalia ma le Pasefika o loo tauaofia i le asõ, i Fiti.

“O le mafuaaga lea ua le faataunuuina ai le faamoemoe o le faatautoina o le sui usufono e pei ona tofia;

“Ae talosia ia le faamoemoe a le tofa ia Namulauulu o loo fai ma sui o le atunuu e ala i palota o le tofigā Peresetene o le itulagi nei i le lakapi.”

E pei ona silafia, o le tofa ia Namulauulu sa manumalo i le faiga palota laititi a le itumalo Fa’asaleleaga No.2 i le masina o Mati i le tausaga nei, ina ua tu’umalo le afioga ia Pau Sefo Pau ia Ianuari i le tausaga nei lava.

E tulai mai Namulauulu i le tofi, o loo avea ma Peresetene o le Iuni Lakapi a Samoa ma o ia foi o le Pule a le kamupani a le Federal Pacific Insurance.


Deidre Fanene

31 years old from the village of Leauvaa. Married with three children.
Deidre Fanene