“Ua ou lava tapena ma ou mafanafana ma leai foi sou popole i le aso o le faigapalota.”
O le saunoaga lea a Veatauia Faatasi Puleiaga o loo sauni atu mo le faigapalota laititi a Vaimauga Numera 3 o loo tapena mo le masina fou ia Fepuari.
Saunoa Veatauia, “Ua ou lava tapena mo le faamoemoe, ma o loo o’u mafanafana foi, ma e leai foi se popole ia te a’u, a’o lumanai le faamoemoe..”
I le faigapalota o Aperila 2021 sa tauva ai Veatauia i lalo o le faamalu o le Faatuatua i Le Atua Samoa ua Tasi (FAST).
Sa tulaga lua Veatauia ae manumalo le afioga ia Tapunuu Papalii Niko Lee Hang i le nofoa o le Itumalo, ae le’i mamao se va i le faitau mulimuli o palota.
“Sa maua lava le mafanafana i lo’u nei sui tauva, ma le faamoemoe e toe maua so’u avanoa i le isi palote tele (general election) i le 2026.”
Saunoa Veatauia, “e na o le 19 sa ma valavala ma le afioga ia Tapunuu..”
“Sa ave lava le faatuatuaga ma le lagolago ia Tapunuu, e pei ona avea ai Tapunuu ma Taitaifono o le fono faavae a le Itumalo o Vaimauga, ae ou lagolago sua i le tofi o le Sui Taitai..”
Peitai o le tuumalo o le afioga ia Tapunuu, lea ua avanoa ai le nofoa o le Itumalo.
“Ua ou manatu ai, o lo’u laolao lenei ou te faa’auauina ai le tiute sa tauave mai e sia foi tamalii ua leva ona tautua i si o matou Itumalo.”
Saunoa foi Veatauia, “E leai se agaaga faamaualuga poo se isi lava itu, ae pau o lea, o le fia fa’aaogaina o lo’u faatauvaa e tautua ai lo’u itumalo, ma faaleo ai manaoga ma vaega o loo fia faaleleia i totonu o lo’u itumalo, ma sosoo lava taumafaiga sa tau asa mai e Tapunuu.”
Ta’ua foi e Veatauia, o le a tuu atoa lona taimi ma lona malosi e saili ai se ai ma se manuia mo lona itumalo.
O le susuga ia Veatauia, ua 65 ona tausaga, sa galue i le Matagaluega o Faamasinoga mo le 30 tausaga, o se Resitala. E malolo o ia e sauni mo le faigapalota o le 2021, ua avea o ia ma se Sui Resitara o le Faama Maualuga.
O ia o se tama fanau mai le afioaga o Magiagi, o se tasi nuu mavae o le Itumalo o Vaimauga numera tolu.
E lē o mautinoa i le taimi nei pe toafia nisi o le ā tauva mo le sailiga o se tofi o le Itumalo.
Ae ua na o se tasi sui tamaitai, Tupuola Theresa Finau, sa ia faalauiloa mai lona lē mafai ona tauva i le faigapalota o loo loma nei, ona o se tulafono e faamalosia ai le umia o se suafa matai i totonu o le Itumalo.
