Lauga: Minisita o Galuega Felauaiga ma Atinae Eseese mo le Tatalaina o le Auala Simā Uamea o Nuusuatia

01 Oketopa 2021, Pepa o Faamatalaga, Gvt Press Secretariat. 

O le lauga lenei a le Minisita o Galuega, Felauaiga ma Atinae Eseese mo le Tatalaina o le Auala Simā Uamea o Nuusuatia.

FOLASAGA MUA
Ua ma’ea momoli lapalapa o malo i le faapolo ma le faasagi e ta’ui ai lo tatou va tapuia ma lo tatou Tapaau i le lagi, tau ia o se foe faae’e i le tau so tatou vaivai, ae faamoemoe mea uma i le Agalelei o lo tatou Tapaau Sili. E faafetai ai i le taitai o le sauniga lau susuga Rev Pili Mapuilesua mo le upu o le Tala Lelei lenei aso, faafetai tapena, malo Tatalo, ia faamanuia pea le Atua mo lou valaauina i le galuega.

PAIA;
Ae ua Tu manu ae le Tu logologo, ua se’e lili’a foi Si’uleo ina ua pau tuaa’au ma fuamalu i le malaefono i Nuusuatia a le Manu,
Aua le Afio o le Sa’o fetalai ia Leituala,
Susu mai le Manu’a, faapea le paia o Usoalii
Susu mai Tuilimu ma Laifata
Tulouna I Vaigafa I lau susuga Te’o
Maliu mai Tupai o le to’oto’o o le manino ma le ‘aava,
Na e taitaoi upu o le Alataua ma Tapa’au Le Fano.
Tulouna Lava!

Liliu ane Le Vai o Sina i lea matua talaga, o lea ua mamalu mai le aitu o le aoa, aua le afio o lau afioga I le Tamaitai Palemia, lau afioga i le Sa’o Faapito, lau afioga Fiame Naomi Mata’afa, ua afifio foi le paia maualuga o le Faigamalo i ona tulaga faalupeina,
Susu mai le sui o le Faletupe o le Lalolagi (World Bank) ma le Malo o Ausetalia. Susu foi sui o le Komiti Fa’atonu fa’apea Faauluuluga o le Pulega o Felauaiga i le Laueleele (LTA) tainane Samoa ua potopoto.
Ua malo afua ailao ua maua, aua ua tau mai vaa na tiu I vaa na tau, ae o lo o mamau pea lago o le vaa na fao aofolau, I le La’oifua ma le lagi e mama i le aofia ua potopoto mai e molimauina lenei faamoemoe taua.

TALOFA TALOFA LAVA..

TALA O LE GALUEGA
O le tasi nei o galuega Faapa’aga a le tatou Malo ma le Faletupe o le Lalolagi (WB) faapea le Malo o Australia i lana polokalame o le ERAP (Enhanced Road Access Project) aua lava le toe faaleleia o auala tetele ma auala kolosi sima, ina ia mafai ona tali atu I le ogaoga o aafiaga i lologa ma tafeaga mai le leaga o le tau.
O le vaega tupe lenei ole ERAP, e $29.3 miliona Tala Amerika, o se tupe na faamealofaina ma faamatuuina mai e le Faletupe o le Lalolagi ma le Malo Ausetalia ia Fepuari 2014, ma e tele ni galuega ua faatinoina ai:
– O le toe fausia o le auala kolosi I Leone lea sa fa’aleaga ina I le afa o Evani lea sa tatala aloaia I le 2017;
– Toe faaleleia o vaega o le auala e aga’i atu ile malae vaalele (West Coast Road), amata atu i Saina e tau i Malua
– O le fausia o le auala sima i Maliolio ma le auala fou i Samalaeulu i Savaii lea sa tatala aloaia I le 2020;
– O le toe fausia ina o le auala sima i Aia lea sa amata faatasi ma le galuega lenei a Nu’usuatia
– ma le tele o nisi galuega aoga mo tatou tagata sa mafai ona faatinoina ai

O nei tupe ua fa’ameaalofa mai e tatou pa’aga mo le fa’aleleia o tatou auala fa’apea auala kolosi, ona o le lelei o le fa’atinoina o galueag fa’apea le usitaia e le Malo o Samoa o le fa’aaoga ina oseleni tusa ai ma aiaiga ma a tatou pa’aga fa’apea fo’I faiga fa’avae a le tatou Malo.

Sa faatino tauofoga faalaua’itele masani a le Malo e tusa ai ma faiga fa’avae a le Faletupe a le Lalolagi fa’apea le tatou Malo; ma manumalo ai le kamupani a le King Construction i le tau e $2,044,437.00,

E 18 mita le umi ae 9.2 mita le lautele o le auala sima, ma o le konesale a le Origin Engineering sa feagai ma le tusia ina o ata (designer)o lenei galuega, ae o le Pulega o le Fela’uaiga I le Laueleele ma le Origin Engineering sa feagai ma le mata’ituina o le galuega (supervision).

Talu ai ona ole tele o fita ole faatinoina ole galuega, ma le manaomia o le faamae’ae’a lelei o itu uma ole galuega na faato’a mae’a ai lenei galuega ia Me 2021.

FOLASAGA LAUTELE
O le tasi nei o galuega toe faaleleia a le Malo sa faatinoina ona o aafiaga i lologa ma le loulouã o le tau sa feagai ai ma si o tatou atunuu. O le naunauta’iga lava o le Malo ia saogalemu ma faigofie femalagaina a le mamalu o le atunuu. O le ala foi lena ua lautasia ai lenei vaega o le auala i le faasoa Faapa’aga a le Malo ma le World Bank, ona o le toatele o le mamalu o le atunuu o loo alala ma aumau I lenei itu o le atunuu.

E le o po se silafia o loo feagai pea le lalolagi ma si o tatou atunuu ma puipuiga o le faama’i o le koviti-19, peita’i sa fa’aauau pea e le Malo ia galuega faaleleia ma atina’e talafeagai aua le saogalemu o femalagaina i auala tetele.

UPU FAAI’U
E momoli le agaga faafetai i le paia ma le mamalu o le tatou afioaga nei, ma i latou o lo’o nofoia lenei vaega o le atunuu, aemaise si o tatou atunuu lautele, faamalo le onosaí ma le lava papale a o feagai ai le Malo ma lenei atinaé. E le sili lava le Ta’í i lo le Tapuaí. E le atoa foí Tupe i le fafao pe a aunoa ma lau Tapuaíga.

Faafetai I Pulega o kamupani o le Origin Engineering fa’apea le King Construction mo galuega mae’ae’a ma ua maualuga ma lelei faatinoina.

Momoli foi le faamalo i le Komiti Fa’atonu fa’apea le Pulega o Fela’uaiga I le Laueleele ma isi Matagaluega o le Malo mo lo outou galulue faatasi o lea ua tino mai lenei galuega tele ma le matagofie.

Toe Upu
Fa’afetai Tele Lava, i le Faletupe o le Lalolagi (World Bank) ma le Malo o Ausetalia mo lo outou lagolago sua i le Malo o Samoa ma ona tagata.

To the World Bank and the Government of Australia, I wish to convey behalf of the Government of Samoa our sincerest Fa’afetai Tele Lava for funding this project which provides a sustainable, safe, secure and environmentally responsible transport network but also that which supports Samoa’s economic and social development.

We look forward to continue our working relationship for more developments in the future.

Ia auomanū lenei aso i le alofa o le Atua pulepule tetele.

Soifua.

____________________________________________________________________________
ATA PUEINA MO LE TATALAINA ALOAIA O LE AUALA SIMA UAMEA I LE AFIOAGA I NUUSUATIA (SAFATA);

(9)