Palemene o Samoa, Ianuari 2022. I le aso lona lua o taualumaga o fonotaga a le Palemene, na faa’auau ai pea ona sau saunoa afioga i sui mamalu e momoli a latou lauga faataupou.
I le itumalo o Sagaga 2 e aofia ai Tuanai, Afega ma Malie, na maitauina ai le tele o mataupu eseese sa saunoa iai le tofi o le Itumalo, le afioga ia Maulolo Tavita Amosa lea sa manumalo i faigapalota laiti na faatinoina i le masina o Novema i le tausaga na tea nei.
Sa tele ni mataupu eseese na afea i le saunoaga a Maulolo, e laulauina ai nisi o auala e moomia mo le faaleleia atili o le soifua manuia o le lautele o tagata o le Itumalo. E aofia ai le aoaoina o le fanau i matata eseese, o nisi o tulaga ogaoga e faaleleia ai le auaunaga o le soifua maloloina, faapea foi aafiaga o upega tafailagi i le tupulaga talavou. Sa saunoa foi Maulolo Tavita i nisi o fesoasoani e moomia mo le maketiina o oloa mo fai pisinisi laiti, faapea le au faifaatoaga ma le au fagogota o le latou Itumalo.
Aoaoina o le fanau
I le maitau a Maulolo, e tele tupulaga e le o mafai ona faa’auauina aoaoga i le Iunivesete, ona ua le gafatia le tulaga maualuga e tatau ona iai. O nisi foi o tupulaga ua vave ona fai a latou aiga poo taitoalua, ae o le fesili, o le a se fesoasoani mo i latou, o le tali na momoli mai e le sui mamalu, e tatau ona faa’aoga loa le polokalame o le TVET (Technical Vocational Educational Training) poo polokalame ia e a’oa’oina ai le faakamuta, eletise, inisinia, kuka, palama, mea taulima, suisui, e saili ai lumanai, ma vaoia ai le tulaga lea o le faatupulaia o fuainumera o i latou e leai ni galuega.
Sa faalauiloa e Maulolo se ripoti a le Matagaluega o Aoga, o loo faamauina ai e 51% le aofai o tupulaga talavou, e leai ni galuega.
“O le talosaga e fia faia se polokalame lea i lo matou itumalo. E fia faatuina se TVET Center i Sagaga 2”.
Sa momoli se tuualalo a le sui i le Minisita o Aoga, e toe silasila ifo i le tulaga o suega a le Year 8 Exam. “Ua na o le multiple choice, ae leai se reading ma se writing skills mo le tamaititi aoga”.
Aganuu
Sa saunoa Maulolo i le mou atu o le aganuu poo le cultural knowledge i le tupulaga talavou, aua ua tele le taimi e faa’aoga le api o foliga poo le facebook, poo nisi o polokalame e maua i luga o upega tafailagi. Ua alu ai taimi i mea sese, ma faa’aoga sese e mea le talafeagai, e osofai ai ni lagona le talafeagai. Sa fautuaina e Maulolo le unaia e le Matagaluega o Aoga, o se polokalame e faalauiloa ai ata o tala tuu poo tala o le vavau, i o latou afioaga.
Soifua Maloloina
Sa tuuina mai e Maulolo ni ana sailiiliga i le Matagaluega o le Soifua Maloloina, e faapea e valu tesi ma le tolu – 8.3 le au tausi gasegase, o loo vaaia le 1000 tagata mamai.
“O lona uiga, e tasi le tagata faigaluega soifua maloloina o loo vaaia le 120 tagata mamai – 1:120. Sa taua e Maulolo, o Savaii e tasi le tausi soifua, e na te vaaia le 300 tagata mamai.
O le fesili a le sui faipule a Sagaga 2, ae faafefea pe a oo mai le koviti, lona uiga e le lava le aufaigaluega.
“O le talosaga e fia toe faatu se falemai i lo matou itumalo, sa iai muamua. O loo iai le fanua e 4 eka e faatino ai le faamoemoe, ona ua mamao Leulumoega, mamao foi le oo atu i Motootua, ae manaia ae toe faatu le falema’i i si matou itumalo”.
Sa oo foi le saunoaga a Maulolo i nisi o polokalame e fia avatu i le Itumalo o Sagaga 2, e pei o le PEN poo le Package of Essential Non-Communicable Disease. O se polokalame mo le faalauiloaina le tausiga o le soifua maloloina ma le alo ese mai gasegase le pipisi mo non-communicable diseases.
“O lea ua maitau atu ua 22 itumalo ua ave iai le polokalame lea ole PEN. O le talosaga aea pe a aumai foi lena polokalame i si o matou itumalo, e fia maua nisi e faia aoaoga o le tomai lea i tamaitai a le matou itumalo”.
Faatoaga ma Faigafaiva
Sa oo atu le talosaga a Maulolo i le polokalame o le CRC poo le Climate Resilient Crops, lea e fai ai aoaoga mo faifaatoaga i mea toto e sao mai matagi ma faalavelave faale-natura. Sa talosagaina se masini e faamalu ai le eleele mo le galueaina o faatoaga e pei ole ufi ma isi mea toto, a oo mai vaitau o matagi ae le afaina ai. “E manaomia foi polokalame ia o short courses a le ofisa, e faasoa mai ai le tomai e faatino ai ma puipuia ai lafu manu”.
“E talosaga atu e fia fausia se maketi mo le au faifaiva, tasi lenei itumalo e toatele le au fagogota, ia lae faalala solo i autafa o le auala, ae manaomia se maketi o i’a”.
Fanua ma Tuaoi
Sa oo foi le saunoaga a Maulolo i le itu tau Faamasinoga, mo se fofo i le tulaga o le tuaoi ma Leauvaa. Taua e Maulolo, o loo iai talosaga apili e lei valaauina lava.
“Ua matou fiu e tu’itu’i atu i na tausaga, o loo iai matou talosaga o apili, ae ua ma’ea iai faamasinoga, ol e tuaoi ma le afioaga o Levi Saleimoa, o loo noatia ai Tuanai, Afega ma se vaega o Leauvaa ona galulue ai, peitai, o loo galulue pea e le afioaga o Levi”.
Sa talosagaina le matagaluega o le fanua a le Malo, le Samoa Land Corporation, ona o le saunoaga a le sui faipule, o fanua o Malie, o loo faaoga e le SLC. “E tatalo atu pe mafai ona toe faamatuu mai fanua ia, ona ua tupu ma ola le afioaga”.
I le itu tau gataifale ma le puipuiga o le siosiomaga, sa tatalo atu foi Maulolo i le Minisita o le Siosiomaga e fia totoina le togo i gatai o le latou itumalo .
Galuega Tetele
Sa taua e Maulolo, e na o Afega lava le auala galue a le Itumalo e lei faaleleia. “I talosagaina lau afioga i le Minisita, toe pau lava lea o le auala galue a le matou itumalo o loo faaletonu”. Sa talosagaina foi e fia faia se taligalu, “leaga a oo ina sua tutui le tai, ia e oo mai le sami i lalo o moega..”
Sa tā’ua foi e Maulolo se faafitauli o loo tulai mai i le faataatiaina o paipa mo aiga o le afioaga o Afega. O loo pasi atu i luma o maota ma fanua a isi aiga nei paipa, ae lei oo atu i fale a ē totogiina mita. Ona o faigafaavae a le Matagaluega o le Suavai, e le o mafai ai ona maua se fofo o lenei faafitauli. Ae talosagaina le toe tagai iai o le pulega mo se fofo.
E Lei Fauina Roma i se Aso se Tasi
Na faaiu le saunoaga faataupou a le tofi o Sagaga 2 ia Maulolo Tavita Amosa i upu faapea, “E lei fausiaina Roma i se aso se tasi, ae taatia atu i ina, o loo iai le uta o fai mealelei, aua se vaivaiga o le nei sui, au’a foi le tapuai mai si ou itumalo”.
