Ua tuuina mai se lapataiga malosi mai le Faamasinoga aga’i i ofisa faasalalau, ina ia mulimulita’ia taiala a le Faamasinoga ma le JAWS, aemaise ia faatino i le auala maualuga le auaunaga, ma ia lipoti na o vaega sa fofogaina i totonu o le potu faamasino.
O le finagalo a le afioga i le Faamasino Sinia o le Faamasinoga Faaitumalo ia Talasa Atoa-Saaga, e faavae lea i se faasalalauga a le Samoa Obsever, e pei ona ia ta’ua, sa latou faasalalauina ua teena e le Faamasinoga ae maise o le Faamasino ia Talasa Atoa-Saaga le talosaga mai loia a itu tetee No Case to Answer ae o le taimi lena, ua na o nai itula talu ona tuuina atu lea talosaga i luma le faamasinoga.
Saunoa Talasa, “O le mataupu sa talanoaina i le Chambers poo Potu Ofisa o Faamasino. Ua na o loia a itu e lua, le resitala ma le tamaitai faamasino, ma e ao ona silafia, e le mafai ona faasalalauina.
Sa saunoa fo’i le Faamasino i se auaunaga faasalalau i fafo atu o Samoa, lea fo’i sa tā’ua i se latou polokalame update mai le Faamasinoga, ua teena e le Faamasino ia Talasa Atoa-Saaga le talosaga No Case to Answer.
Saunoa Judge Atoa-Saaga, “E ao ona usitaia e le au faasalalau taiala o le Faamasinoga e atagia ai le maualuga o le faatinoga o le latou fo’i pito laau.”
Ua poloaina e le tamaitai faamasino le faia lea o se suesuega, pe faafefea ona liki mai i tua i le au faasalalau talanoaga sa faatinoina na o loia ma le faamasino.
E pau le vaega na tā’ua e Judge Atoa-Saaga o lona faatonuina lea o le itu a leoleo e faaauau ona valaau molimau a le itu a leoleo, ae o se taimi, ona tuuina mai lea o sana faaiuga e tusa ma le talosaga o le No Case to Answer.
Ao lei ma’ea taualumaga o le faamasinoga i le Aso Lulu na toe faamanatu mai ai fo’i e le faamasino i le vasega o tusitala ina ia lipotia na o vaega na talanoaina i totonu o le potu faamasino ae le o ni faamatalaga na maua i fafo atu o le potu faamasino e atagia ai le maualalo o le faatinoga o le auaunaga.
Sa faapea foi se faamanatu na tuuina atu mo i latou uma o loo aafia i lenei mataupu, ina ia aua nei faaalia ni manatu poo ni tusitusiga i luga o upega tafailagi e faatatau i lenei mataupu o loo tagofia e le faamasinoga.”
O le Aao Lua o lenei vaiaso na tuuina atu ai le talosaga o le No Case to Answer mai loia a itu tetee, ma faatulaga mai ai lea o le Aso Lulu poo le aso e sosoo ai e tuuina mai ai lana faaiuga i le talosaga.
Petai, o le aoauli lava o le Aso Lua i le itula e 2 i le aoauli na toe feiloai ai na o loia a itu e lua ma le tamaitai faamasino ma poloaiina ai e le itu a leoleo ina ia faaauauina pea ona valaau molimau, e tālia ai se taimi e tuuina mai se faaiuga i le talosaga No Case to Answer.
O lenei mataupu e pei ona silafia e le mamalu o le atunuu, o loo tuuaia ai le afioga ia Laaulialemalietoa Leauatea Polataivao Schmidt, Fepuleai Faimata Su’a, Li’o Faataumalama Auava, Lise Marie Schmidt, Sivai Kepi ma Samuelu Leau Su’a (also known as – aka Sam Sua, Fauena Leautuli Toese Sua, Samuelu Toese).
E silia ma le 100 moliaga mo Samuelu Su’a ae 58 moliaga mo Sivai Kepi. Mo le Faipule ia Fepuleai Faimata Sua, e 18 moliaga, ae o le sa fai ma Malu o le Malo iā Lio Faataumalama Auava e 9 moliaga ma le tamaitai ia Lise Marie Schmidt e 4 moliaga. Ae e 4 foi moliaga faasaga i le afioga ia Laaulialemalietoa.
O loo tuuaia i latou i moliaga o le fatu fua i le faiga o faamatalaga molimau (fabricating evidence), taupulepule ina ia faia se soligatulafono (conspiracy to commit an offence), faia o faamatalaga ua faaleagaina ai le tauleleia o isi (defamation) ma le faasoesa e faaaogaina ai ala tau fesootaiga (harassment using electronic means).
O le mataupu lenei ua tele na lagalagā ai manatu ma finagalo o le atunuu ma fesiligia ai le amiotonu o leoleo ae faapea foi latou o loo tuuaia i le faia o faamatalaga sēsē faapea le faia o faamatalaga fafau.
E lima vaiaso na atofa e le faamasinoga e suesueina ai mau o lenei mataupu, peitai, o lea ua savalia le fa o vaiaso ae lei taitai ona ausia le afa o molimau e 76 a le itu a leoleo.
O lea ua faatulaga mai ai le aso atoa e aofia ai ma afiafi, atoa ai ma Aso Toanai ina ia vave faamaea le faasologa mai o molimau.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
