Ua faamaonia mai e le Ofisa Sili o auaunaga i luga o vaa (Samoa Shipping Services) le afioga ia Lautimuia Afoa Uelese Vaai, ua toe faafoi mai nisi o seila sa galulue faakonakarate i atunuu i fafo. E silia ma le 350 le aofai o i latou o loo galulue nei i atunuu i fafo, ae toasefulu lea ua toe faafoi mai talu mai le masina o Iuni 2021.
Sa saunoa Lautimuia, e le o iai se tulaga faapea ua ave i le tulafono nisi o e ua tuuaia, ae ua na o le toe faafoi mai lava i Samoa nei aua o aiaiga faalegaluega sa le usitaia. O le saunoaga a le Ofisa Sili, o le toatele o i latou nei ua faamalolo mai ma konekarate o tamaiti fou faatoa malaga, ma e laiti foi, e i le va o le 18 e agai atu i le 25 tausaga.
Saunoa Lautimuia, e silia ma le to’asefulu i latou ua faamalolo mai talu ona malaga le toatele lea sa mafai ona toe maua konakarate, ina ua toe tatalaina avanoa mo Samoa i le masina o Iuni o le tausaga ua tea nei.
O le mau a le Ofisa Sili, ona o le toatele o seila fou e maua lava le toaselau ua mafai ona tuuina atu mo konakarate, lea la ua tulai mai ai le toasefulu lea. “This is expected.”
“E to’aono lea ua taunuu mai Samoa, ae o le isi vaega o loo faamoemoe e maua mai ni avanoa i malaga faapitoa a lo tatou Malo i le masina fou.
O nisi o mafuaaga ua faamuta ai le auaunaga a nei seila, o tuuaiga i le lē faamaoni i aiaiga o le galuega e pei o le tuai ona usu, poo le lē faigaluega foi.
O le isi moliaga e pei o le sexual harrasment, sa taua e le Ofisa Sili, e le ogaoga, ae o ni fesootaiga sa faia i luga o telefoni, lea e tuuaia ai se tasi o seila.
“O loo mafai lava ona toe maua avanoa i nisi o tuuaiga nei, ae o tuuaiga ogaoga e pei o le faaoolima ae maise pe a tagofia le ava malosi, e leai la se avanoa e toe maua”.
Saunoa Lautimuia ua silia i le 300 tatou seila o loo galulue i luga o meli, ae silia i le 50 le aofai o tatou seila o loo galulue i luga o vaa oloa.
Tā’ua e le pule sili o loo vaaia pea le matala mai o faitotoa o kamupani mai atunuu mamao e manaomia ai tatou seila i Samoa nei mo galuega. Na ia ta’ua foi o lea ua amata ona matala mai avanoa mo seila tamaitai, lea e toatasi se tamaitai o le a malaga e faigaluega i le Hotel Department a le company lava lea o le Mediterranean Shipping Company (MSC).
“Ua leva ona tuitui pea mo avanoa nei mo tamaitai, lea la ua maua mai le avanoa lea, e le galue i luga o le deck, ae galue i le hotel department,”
O le tulaga o le sauni atu o seila mo avanoa i fafo, o loo tapena foi lava e le tatou ofisa polokalame e faailoa ai i seila o le a tuua le atunuu aiaiga uma, ma le feau tāua, e faa’aoga a tatau avanoa. O le a agai foi le matagaluega, e toe faalelelia atili nei polokalame, Orientation Programmes.
O totogi o nei konakarate, e oo atu lava i le $2000 tala Amerika i le masina mo le tagata e toatasi, ae ese ai tulaga o alauni.
E silia ma le $40 miliona tala Samoa i le tausaga le faamanuiaga e tului i le tamaoaiga o Samoa, pe a taunuu ma le manuia fuafuaga uma o lenei polokalame, o le ave lea o seila mai Samoa e faafaigaluega i atunuu i fafo.
(0)
