E tasi se maliu na tulai mai i le faaiuga o le vaiaso, ao iai lo tatou atunuu i tulaga louloua o le tau i timuga mamafa ma matagi fa’ata’uta’u malolosi.
E 17 tausaga o se atalii talavou mai le afioaga o Falelauniu-Uta, na maliu i le Aso Sa, 9 Mati 2025 pe tusa ma le itula e 6 i le afiafi ina ua paū iai le uluulu o se niu sa agai atu o latou aiga tuaoi e tā i lalo.
I se faatalatalanoaga ma le tamā o lē ua maliu, le tamā ia Atapana Pelenato, na ia tā’ua ai le faigatā ona faagalo lona atalii, ae maise ae le ta’e o le fatu o si ona toalua ia Maima ina ua toesea se tasi o le fanau peleina.
Na talosaga mai lona aiga tuaoi e fia tuu i lalo niu e lua lea e i totonu o lona fanua, nei pa’uu atu i lo latou fale ona o le malosi mai o matagi i le afiafi o le Aso Sa lea sa aafia uma ai Samoa.
“Sa faapena ai loa ona fai, ae o lo’u atalii la o James, sa fesoasoani i le aiga mo le tosoina o le niu ao faia le galuega mo le iliina i lalo o niu.
“Peitai, e faapea mai le tala a i latou sa iai i le galuega, sa alu le tuli a i latou na tosoina le niu e aofia ai ma si o’u atalii o James..”
“E faapea la na toe foi lo’u atalii e aumai lona seevae, ma o i lea na maua ai e le ulu o le niu ma tanumia ai.., ma na maliu ai lava o ia i le nofoaga lea na tanumia ai i le niu.”
Na tā’ua e Atapana, o lagona mātuitui o le alofa i le atalii ona o lona lima taumatau lea i lo latou aiga..
“O a matou feau e faamoemoeina tele, ao lea ua motusia le mafutaga.”
Tā’ua foi e le tama o le aiga, e lē o mailoa se aso o le polokalame a si ona atalii ona o lea ua faailoa mai e leoleo, se’i tālia poo le ā se faatonuga mai le Pule o Maliu Lilo, pe ono fai se taotoga faapitoa, o le tala lea a leoleo.

O le tamā ia Atapana e 56 tausaga o lona soifua ma o le atalii ua maliu nei, o le lona lua i le la fanau e toafa ma le tina o Maima i lo latou aiga i Falelauniu-Uta.
Saunoa le tamā, na alai lava ona fai le galuega o le tuuina i lalo o niu i le Aso Sa na se’i mavae atu nei, ona o le popolega nei pa’u atu se niu i le fale o latou aiga tuaoi.

O le tama ia Leiataualesa, o le aiga tuaoi lea sa faatinoina le galuega.
I se faatalatalanoaga a Leiataualesa ma le Radio Polynesia ia Leilua Ame Sene, sa tā’ua ai, o ia sa faasinosinoina le galuega ao faatino e lona atalii.
“Na pa’u le niu muamua, ae o le pa’u o le niu lona lua, lea sa tupu ai loa le faalavelave.
“Na pa’ū loa le niu, alu uma le tuli a le sa faia le galuega, ae peitai, o si atalii ia James na toe tamo’e ane e avatu lona seevae na mamulu pe lavea, lea sa tupu ai loa le faalavelave.”
“Ua ou te’i i le ee mai o le tagata, o le tina o James, ae ou oo atu, o si atalii lea ua pa’u iai le uluulu o le niu.”
“O James o le uo mamae a si ou atalii.”
Tā’ua e Leiataualesa, e leai lava se mea o loo faaletonu i lo latou va nonofo ma tuaoi, ae ua momoli faamaisega mo le tamā ia Atapana ma le tinā ia Maina..

Ua saunoa le tama ia Atapana, e ui ina ua maliu lona atalii, peitai, e maua lava le loto faamagalo i lo latou aiga tuaoi. E le o se faalavelave na fuafuaina, ae le’i manatu foi se isi o le a tupu.
“Ae sili i lea le vaai i Le Atua ma lona finagalo, faamagalo i luga o le satauro mo i tatou.”
E lei manuia fesootaiga i le Komesina o le Matagaluega o Leoleo, Falepuipui ma le Ola Toefuataina le tofa ia Auapaau Logoitino Filipo mo se tala lata mai i suesuega a leoleo.


- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025













