O lo’o finau pea auaunaga faaturisi i le motu tele i Salafai ina ia fa’afetauia le tulaga pagatia o lo’o feagai nei ma pisinisi tau faletalimalo, ona o a’afiaga o le lalolagi i le fa’ama’i oti o le Koviti 19.
I se fa’atalatalanoaga ma le afioga i le Peresetene o Faletalimalo (Samoa Hotel Association), Ainuu Tupai Saleimoa Va’ai na ia fa’aalia ai o lo’o taumafai lava le tele o faletalimalo i Savaii e fa’atino le tulaga e pei ona fautuaina ai e le Malo, ina ia fa’ataugofie ma fa’apa’u le tau o auaunaga e tu’uina atu i tagata.
“Peita’i e iai lava faletalimalo e latou te le’o mafaia le fuafuaga lea ona e ta’utino atu, e fai sina taugata tele o le fa’atupega o lenei pisinisi (high cost industry),” o le saunoaga lea a Ainu’u.
“O lo’o taumafai lava e fa’atino ni polokalame e mafai ona fa’atumauina ai pea le auaunaga a nai faletalimalo i Salafai nei, ona ua lagona uma le mafatia i a’afiaga o le tapunia o tatou femalagaiga (borders),”o le isi lea saunoaga a Ainu’u.
Saunoa Ainu’u, o le popolega sili lea e iai nei, afai ae o’o atu lava i le fa’ai’uga o le tausaga o lo’o tapunia pea femalaga’iga, o lona uiga o le a tilotilo loa le Asosi i nisi o fuafuaga ma polokalame e taumafai e fa’atumauina ai pea auaunaga a faletalimalo ma galuega mo nai tagata faigaluega.
“O le fuafuaga a le industry e tatau ona fa’atumauina pea le tatou Domestic Market, poo lea lava le taimi e tatala ai borders, ae o la e faatumauina pea e fesoasoani ai mo nai a tatou faletalimalo i Savaii nei,” o lana lea saunoaga.
Na momoli le fa’afetai a Ainu’u i le Malo o Samoa ona o le fesoasoani sili mo nai faletalimalo i Savaii, o le tele o polokalame a le Malo lea o lo’o avatu i Savaii ma manuia ai le tele o faletalimalo i le Motu Tele.
“Pau lava le tatalo ia vave ona tatala a tatou femalaga’iga ona toe sologa lelei foi lea o auaunaga a faletalimalo.”
(0)
