O loo lagolagoina e le sui Faipule o Aleipata Itupa i Lalo, le Afioga ia Fepuleai Fuimaono Titimaea Tafua, le faatumauina pea o le 10% o le nofoa o tamaitai i totonu o le Palemene.
I le felafolafoaiga o le fono usu a Samoa, o loo saunoa ai sui mamalu i le ripoti a le Komiti Faapalemene, e pei ona latou iloiloina fautuaga mai le ripoti a le Komisi Suesue o Faigapalota.
Na faaleo ai se finagalo a le Afioga ia Faleomavaega, “Ou te lagolagoina le faatumauina o le 10% o le nofoa o tamaitai i totonu o le palemene. E faafefea ona ou teena, o lea e afio atu le afioga o le tamaitai faipule o le matou itumalo?”
“O se famanuiaga tele foi o lou itumalo lona foi tulai mai i le tofi o le itumalo. Ioe, o le mea lea ou te lagolagoina ai le faatumauina pea o le 10% o le nofoa o tamaitai.”
I le amataga o lenei vaiaso, na saunoa ai le Taitaifono, le Afioga ia Auapaau Mulipola Aloitafua, le lilifa lea o finagalo o i latou na fesiligia ma faatalatalanoaina e teena le 10%.
I faamaumauga o le Komiti, e 398 le aofai o i latou na fesiligia.
E 240 i latou na teena le 10%, 20 i latou na ioe e faatumauina le 10%, ae 18 i latou na manatu e fai se isi faiga i le 10%.
O se mataupu na fefulisa’i ai finagalo o le Maota Fono.
O se mataupu foi na tutulu ai le Faipule o Alataua i Sisifo, le Afioga ia Aliimalemanu Alofa Ituau, o se tasi o faipule na ofi mai i le 10%, faatasi ai ma le Afioga ia Faagasealii Feagiai Sapoa.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
