Ua matauina e le Ofisa o le Komesina o Faigapalota le OEC, le faaitū’au o le faatinoga o tiute o nisi o Sui o Nuu ma Sui Tamaitai o Nuu, e ala lea i tapenaga mo le resitalaina o Sui Tauva, na moomia ai lo latou pitola’au.
I se faatalanoaga ma le Komesina o Faigapalota le afioga ia Tuiafelolo Toleafoa John Stanley, na ia saunoa ai, “O le faafitauli lea ua maitauina e le Ofisa, o le pito tasi lea o le faatinoga o tiute o Sui o Nuu ma Sui Tamaitai o Nuu..”
“E fiu le sui tauva e tau saili Sui o Nuu mo le sainia o a latou talosaga mo le faamaoniga ua latou ausia aiaiga o le tulafono e mafai ai na resitala o se Sui Tauva mo le faigapalota.”
O se tasi o tiute faale-tulafono a Sui o Nuu ma Sui Tamaitai o Nuu, o le latou agai mai lea e faamaonia poo faatino monotaga a sui tauva (Tulafono o Faigapalota 2019).
E pei ona saunoa le Komesina, “O le Sui o le Nuu poo le Sui Tamaitai o le Nuu, e saini mo le faamaoniaina, o loo faatino e sui tauva aiaiga o le tulafono.
O le saunoaga le komesina, sa le tatau lava ona tulai mai lea faafitauli i sui o nuu ma sui tamaitai o afioaga.
“Afai e lē o ausia e le sui tauva aiaiga o le faatinoga o monotaga, poo le taimi e aumau ai i Samoa, e tatau ona omai pea e faailoa iai le mea amiotonu, ae lē o le fiu o le sui tauva e vili ua lë talia le telefoni, saili atu fo’i i lona fale, ua lē maua.”
Ua faailoa foi e Tuiafelolo, o loo tapena se auala e faailoa atu ai i le Matagaluega o Tinā ma Tamaitai, Atinae o Afioaga ma Agafesootai, ia sui tonu lava ia sa tulai mai ai faafitauli nei.
“E lē tatau ona pito tasi ma fa’aitū’au le faatinoga o a latou tiute, ua le tusa ma taiala mo tagata faigaluega a le Malo..”
I lea lava mataupu, sa tuuina mai ai se timaiga manino a le Pule Sili Lagolago o le Matagaluega o Tina ma Tamaitai ia Aiolupotea Aufai Alan Aiolupotea, agai i Sui o Nuu ma Sui Tamaitai o Nuu e ala lea I le polokalame o le Nuu Vibes a le Matagaluega.
Sa tuuina mai e Aiolupotea Aufai se faamanatu i Sui o Nuu ma Sui Tamaitai o Nuu, i le taua o le latou valaauina, ae maise o le iai nei o Samoa i le sauni atu mo lana faigapalota tele.
“Taimua i le amiotonu, tautua ma le faamaoni ma le le faaituau, ae maise o le tautala i le mea sa’o, aua le filemu o nuu ma afioaga.”
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
