Ua ioeina e se alii talavou ona moliaga o le fasioti tagata faamoemoeina, i le maliu ai o se tamaitiiti 12 tausaga i se faalavelave na tulai mai i Salelavalu Savaii i le masina o Aukuso 2024.
E 12 tausaga o Pauaraisa Amani i le taimi na maliu ai o ia. I faamaumauga a leoleo i lea mataupu, sa faaaoga e Kiuma Talouli Levi se laau malosi o le ituaiga .22 rifle e le’i resitaraina, e faaoo ai le oti i le tamaitiiti, a’o moe i lona ta’inamu.
Na tula’i mai lenei faalavelave ina ua faailoa e Pauaraisa Amani i lona tama, se mafutaga a lona tuafafine matua ma Kiuma Talouli Levi. I suesuega a leoleo, e faapea o le tuafafine o Pauaraisa, sa fai lona toalua i lea taimi, ma o se alii faipisinisi Saina.
O le mafuaga lea o le toatama’i o le ua molia, ma ia agai ai ma le laau malosi ma faaoo ai le maliu ia Pauaraisa ao moe i totonu o le ta’inamu.
Ina ua tula’i Kiuma Talouli Levi , 27 tausaga mai Salelavalu i luma o le Faamasinoga Maualuga i le vaiaso nei, sa ia ioeina le moliaga o le fasioti tagata faamoemoeina.
Sa teena muamua e le ua molia le moliaga, peitai, o lea ua ioeina e tauala atu i lana loia le afioga ia Unasa Iuni Sapolu.
Sa tuuina mai se poloaiga a le afioga i le Faamasino ia Fepuleai Ameperosa Roma, e taofia ai i Tanumalala le ua molia, i lalo o vaavaiga a leoleo e talia ai le Aso Lulu 30 o Aperila e toe fofogaina ai lenei mataupu mo le tuuina mai o le faasalaga.
O lenei mataupu sa faatino se ifoga a le aiga o le ua molia, agai i le aiga o Pauaraisa Amani.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025













