Ioeina le gaoi ao fai ma tagata faigaluega i se tino i tupe $5000 tala

0
1396

Ua ioeina e se tamaitai sa avea ma tagata faigaluega o le falemeli, le Samoa Post ni moliaga o le gaoi ao avea ma tagata faigaluega (theft as a servant).

O Faititili Talifau, o se tamaitai ua ia ioeina moliaga a le itu a leoleo e faasaga ia te ia, i lona toesea lea o se tino i tupe e silia ma le $5,000 tala mai le falemeli.

O lenei mataupu ua silia ma le tausaga talu ona tupu, peitai, o lea ua ioeina e lē ua molia, e tauala mai lana loia ia Vaisala Afoa.

Ua faatulaga mai e le Faamasinoga Maualuga le Aso 25 o le masina nei o le a toe fofogaina ai le mataupu, e momoli mai ai le faasalaga.

I se isi foi mataupu i le moliaga lava lea e tasi, o le gaoi ao avea ma tagata faigaluega, sa tatala ai i tua le tamaitai o Sera Skelton, sa taofia ina ua ia ioeina se moliaga e tasi faasaga ia te ia, ae faaleaogaina le tele o isi moliaga.

O Sera Skelton sa faauluulu iai le vaega o tupe ma auaunaga lautele le Matagaluega o Faamasinoga (Corporate Services).

Sa mua’i tuiina mai lenei mataupu i luma o le Faamasinoga ia Ianuari 2021. E silia ma le 80 moliaga sa iai, ma se tinoitupe e $300,000 tala. Peitai ane, o le tausaga nei na toe ave ai i tua moliaga uma, sei vagana le moliaga e tasi sa totoe ma ioeina e Skelton.

Sa taofia o ia ina ua ioe i le moliaga $20,000 afe tala. O le vaiaso fou e pei ona  faatulaga mai e lana aafioga ia Leiataualesa Daryl Clarke, e toe valaau ai lenei mataupu mo se faasalaga (sentence) a le Faamasinoga.