Ioeina e le Tamaitai sa Avea ma Tagata Faigaluega a le ANZ Moliaga e 330 ae Teena Moliaga e 25

0
3075

Ua ioeina e le tamaitai sa avea ma tagata faigaluega o le faletupe o le ANZ moliaga e 330 a le itu a leoleo, ae teena moliaga e 25.

O Seira Malifa 37 tausaga mai Nuu Fou, sa faauluulu iai le vaega e faatino iai nonogatupe a le faletupe o le ANZ, o loo tuuaia lona aveesea faasolitulafono lea o se seleni $1.5 miliona tala.

O le vaiaso nei na toe fofogaina ai lenei mataupu i luma o le faamasinoga maualuga e lana afioga Fepuleai Ameperosa Roma, ma tuuina mai lana tali aloaia i moliaga e tauala mai lea i lana loia,  Lagaaia Fetu Lagaaia.

Seira Malifa outside Court.

I faamaumauga a le itu a leoleo na fofogaina i luma o le faamasinoga e faapea o ni nonogatupe faafoliga (fake loan) sa faatinoina ma toe tala i tua. O le mafuaga lea o le toe’sea o seleni mai totonu o le faletupe.

O le tausaga talu ai na ripotia ai lenei mataupu e le faletupe o le ANZ i le matagaluega o leoleo e pei ona sa saunoa iai Papalii Monalisa Tiai Keti, ma faasolo mai ai loa suesuega a le matagaluega

E $80,000 se tino i tupe na mua’i maua e le matagaluega, peitai o sa oo atu lava i le $1.8 miliona le aofai atoa.

Ua faatulaga ai nei e le afioga i le Faamasino ia Fepuleai Ameperosa Roma le aso 5 Fepuari e valaauina ai mau a le itu a leoleo, e tusa ai ma moliaga o loo teena.

O le a tuuina mai foi e le Faamasinoga le faasalaga auā moliaga e 330 lea ua talia.

Public Notices