Ioeina e lē sa Galue i le ANZ Moliaga o le Gaoi ao Avea ma Tagata Faigaluega

0
920

Ua ioeina e se tamaitai sa galue i le faletupe o le ANZ i Apia lona moliaga o le gaoi ao avea ma tagata faigaluega (theft as a servant) ina ua ia talaina i tua ni nonoga tupe faafoliga (fake loan) e tusa ma le $80,000 afe tala lona faitau aofai.

Sa tulai le tamaitai o Seira Malifa, 38 tausaga o Nuu-Fou ma Safotu ma ioe atu i luma o le alii Faamasino le afioga Fepuleai Ameperosa Roma o le Faamasinoga Maualuga i le aso.

I taualumaga o le Faamasinoga o loo maua ai suesuega a le Matagaluega o Leoleo, o ni talosaga mo nonoga tupe faafoliga (fake loan) sa ia tapenaina, ma faamaonia (approve) ma ia toe talaina i tua.

O lenei mataupu e pei ona faailoa e le Sui Komesina o le Matagaluega Leoleo Papalii Monalisa Tiai Keti, sa fai iai suesuega a leoleo ina ua lipotia atu e le faletupe.

I suesuega a leoleo i le taimi nei, e le o iai nisi o le faletupe ua faamautu mai o loo aafia pe iai se sootaga i lenei mataupu.

Ua faatulaga e le Faamasinoga le masina o Fepuari, e toe valaauina ai lenei mataupu i luma o le Faamasinoga Maualuga.