Ioe se tama’ita’i i moliaga e 156 o le gaoi a’o avea ma tagata faigaluega

0
6833

 

Ua ioeina nei e se tama’ita’i sa fa’afaigaluegaina e le kamupani a le Federal Pacific Finance ia moliaga e 156 o le gaoi a’o avea ma tagata faigaluega e pei ona molia ai o ia e le itu a leoleo.

O ia lea o La’avasa Esekia, lea na ulua’i tula’i i luma o le Fa’amasinoga Maualuga i le lua vaiaso ua mavae ma toe tolopo mai ai lana  mataupu i le Aso Gafua o le vaiaso nei.

O le susuga i le alii loia ia Tuala Ponifasio lea na tula’i e suia ia Fuimaono Sarona Rimoni Ponifasio, e tu’uina atu le tali ioe a lenei tama’ita’i i luma o lana afioga i le Fa’amasino Sili, Satiu Simativa Perese.

I tolaulauga o lenei mata’upu o lo’o ta’ua ai e fa’apea na amata ona fa’atino e le tama’ita’i o La’avasa lenei soligatulafono i le tausaga e 2016 se’ia o’o mai i le amataga o le 2020.

Na fa’aalia foi o lenei tamaitai sa avea o ia ma tagata faigaluega o le tausaga a le kamupani o le Federal Pacific Finance i le faaiuga o le tausaga 2019, peita’i o le amataga o le tausaga lenei lea na maua ai i su’esu’ega e fai si tele o se vaega seleni o lo’o tuuaia ai nei o ia. 

O le aso 16 o Oketopa lea ua tu’uina atu ai lenei mata’upu mo le lauina o le faasalaga i luma o lana Afioga i le Fa’amasino Sili, Satiu Simativa Perese.


Marieta H Ilalio