Ioe se tamā 82 tausaga i moliaga o uiga mataga i se teneitiiti

0
2453

Ua ioeina e se tama e 82 tausaga lona matua ni moliaga se lua o le pule le uma (carnal knowledge) ua ia fai agai i se teineitiiti e 12 tausaga le matua e pei ona molia ai o ia i le faamasinoga maualuga o Samoa.

I le fofogaina o lenei mata’upu i le amataga o lenei vaiaso i luma o lana afioga i le Fa’amasino Sili ia Satiu Simativa Perese, sa fa’aui ai i tua le moliaga e tasi o le sauaga mataga ae totoe ai moliaga e lua o le pule le uma e pei ona tu’ua’ia ma ioeina e le tama lenei.

I fa’amaumauga a le Fa’amasinoga o lo’o fa’aalia ai o nei soligatulafono na tula’i mai i le afio’aga o Fasito’o-Tai ma o loo tu’ua’ia le faia ai e lenei tama matua o ni uiga mataga i se teineititi e 12 tausaga lona matua.

O lo’o tula’i le Susuga i le alii loia ia Alex Sua mo le tama matua lenei, ma fa’aui atu ai lana tali ioe i moliaga e lua ae tete’e i le moliaga e tasi o sauaga mataga e pei ona fa’aleaogaina ma fa’aui i tua e le fa’amasinoga.

O le aso muamua o le masina o Setema o le tausaga nei lea o le a fofogaina ai se fa’asalaga a le Fa’amasinoga Maualuga mo lenei tama matua.


Marieta H Ilalio