O le vaiaso nei sa iloilo ai e le Faamasinoga Maualuga le mataupu o le faamaloloina o ni Sui Faipule mai le Palemene o Samoa, mo se taimi le tumau.
Ua maea nei le iloiloga o le tagi sa tuuina atu e le Taitai faapea le Failautusi a le HRPP, e tusa ai ma le faaiuga a le Fofoga Fetalai ma le Palemene, e faamalolo i laua mo se taimi lē tumau.
O le tagi sa tuuina mai e le susuga ia Tuilaepa Sailele Malielegaoi lea sa avea ma Palemia o Samoa mo le tele o tausaga, faapea le Sui Faipule mo Faleata 2 le tofa ia Lealailepule Rimoni Aiafi.
O lenei tagi o loo la fesiligia ai le faaiuga a le Maota e faamalolo i la’ua mai le Palemene o Samoa, “seia iai se aso”.
O le finau a alii loia a le Itu Tagi, “O lenei faaiuga e faamalolo ai Sui Faipule, e lē o gatasi ma le Faavae o le Malo Samoa”.
O le itu sa faamamafaina e alii loia, o le aveesea lea o aia tatau a Itumalo nei e lua, e faaleo ai se lagona ma tuuina atu ai so latou sao i upu fai a le Malo, e ala atu lea i le latou Sui Faipule sa filifilia i le taimi o faigapalota a le atunuu.
O le susuga ia Peter Lithgow ma le afioga ia Tuatagaloa Aumua Ming Leung Wai, o alii loia nei o loo finau mo Tuilaepa Sailele, faapea Lealailepule Rimoni.
Na fesiligia e le Faamasino Sili ia Satiu Simativa Perese le alii loia ia Lithgow poo lea le vaega o le tulafono o loo ia tuuina mai. Ae na tali o ia, o le aia tatau e faasino i Sui Faipule o loo i le Vaega 44 o le Tulafono Faavae o Samoa, lea ua aafia ai a lā’ua tiute faausofono Sui Faipule..”
O le isi itu sa finauina e le alii loia, sa faapea mai ai, soo se faaiuga lava e faamalolo ai se isi, e tatau lava ona iai le aso amata, faapea foi ma se aso e faamutaina ai.
Sa finau alii loia, e le tusa ai ma le tulafono le faamalolo o se isi mo se taimi le tumau.
“Afai ae faamalolo seia ma’ea lenei paeaiga, o se solitulafono lea faaiuga, toe soli faavae foi.”
Saunoa le alii loia, o lenei faaiuga e tutusa lelei lava ma le faate’a o le Sui Faipule, ae toe filifili mai nisi Sui Faipule o ia itumalo, ae le o se tulaga lea e mafai ona fai i lalo o le tulafono.
Na faaalia e le loia a le Itu Tetee, sa tatau ona faatino e Sui Faipule ua faamalolo nei se faatoesega agai le Maota Fono, peitai, na faauilavea le afioga ia Tuatagaloa Ming..
“O le Aso 24 o Me na tulai ai le tofa ia Lealailepule ma faatoese i totonu o le Maota Fono, sa faapea mai foi Leala e fai o ia ma sui o le latou Taitai ia Tuilaepa, ona e lei auai i le fonotaga i lena aso, o loo to’esea mo fonotaga a Iuni Lakapi o le Lalolagi, peitai, e le’i talia e le Fofoga Fetalai lea faatoesega..”
O loo ua talia nei se aso e tuuina mai ai se faaiuga a le Faamasinoga Maualuga, e tusa ma lenei mataupu.
O le afiogao i le Faamasino Sili Satiu Simativa Perese, ma le afioga ia Vui Clearance Nelson faapea le afioga ia Tafaoimalo Tologata Leilani Tuala-Warren, o faamasino ia sa faatautaia le suesuega o lenei mataupu.
