E le’i mafai ona nofonofo auaunaga ‘ese’ese a le Malo, i le fa’atinoga o le tautua mo le fa’aleleia o vaega sa a’afia i lologa, aua lava le malu puipuia o le mamalu o le atunuu.
O lologa sa a’afia ai le atunu’u i le fa’ai’uga o le tausaga ua mavae, e le’i malolo le tele o Matagaluega ma Fa’alapotopotoga tumaoti a le Malo e fa’atino a latou matafaioi, ina ia mautinoa ua toe fa’asopolia le atunu’u i le auaunaga tau suavai, eletise, fa’aleleia o auala ma isi auaunaga mo’omia.
O le amataga o le tausaga fou lenei, na toe a’afia ai le atunu’u i timuga mamafa ma lolovaia ai le talafatai o Apia aemaise lava nofoaga maualalalo o le atunu’u e a’afia gofie i lologa, ma auala kolosi i totonu o nu’u ma afioaga.
I timuga tetele ma lologa o le vaiaso na sei mavae, e le’i malolo auaunaga ‘ese’ese a le Malo o lo’o gafa ma vaega tāua o le soifua o le mamalu lautele o le atunu’u, ina ia mautinoa o lo’o maua pea e tagata le suavai ma le eletise.
I le feiloaiga a le vasega o tusitala ma le Ta’ita’ifono o le Komiti Fa’afoe o Fa’alavelave Tutupu Fa’afuase’i (NEOC), Agafili Shem Leo ma le Fa’atonu Sili Aoao o le Matagaluega o le Soifua Maloloina, Leausa Samau Dr. Take Naseri, sa fa’apupula mai ai nisi o auaunaga aemaise o fautuaga mo le mamalu o le atunu’u, a o iai i lenei vaitaimi o timuga ma lologa.
“I le auaunaga a le suavai, o lo’o fa’asopolia pea le atunu’u i le auaunaga, aemaise lava le talafatai o Apia, i maota ma laoa lea na a’afia i lologa ona o le mamafa o timuga,” na saunoa i ai le Ta’ita’ifono.
I le itu tau i le eletise, saunoa le Ta’ita’ifono, e le’o iai se tulaga fa’aletonu o le eletise i totonu o le atunu’u.
“O loo lelei le eletise i vaega uma o le atunu’u, e le’o iai se tulaga e pē ai le eletise i le taimi o lologa i le vaiaso na se’i mavae.”
E o’o lava foi’i i galuega fa’atino mo auala tetele, lea na fa’ailoa e le Ta’ita’ifono, sa fa’atino galuega a le vaega e Pulega o Felauaiga i Luga o le Laueleele, ina ia mautinoa o lo’o malu puipuia le auala tele mo femalagaiga a le mamalu o le atunu’u lautele.
Ae ua na’o se tu’ualalo a le Komiti mo le mamalu o le atunu’u, aemaise lava i latou o fai ta’avale, ina ia fa’alemū le alu o lau ta’avale, ona o galuega toe fa’aleleia a le Pulega o lo’o fa’agasolo.
“E tumau pea foi fautuaga a le tatou Komiti, ia tautuana le mamalu o le atunu’u ina ia fa’apupuna lelei le suavai mo le fofoga taumafa ma le saogalemu mo le taumafaina.
“Fautua pea le atunu’u i le pu’e lelei o le suavai timu, ina ia tu’ufagu lelei ma fa’apuna mo le fofoga taumafa.
Sa fofoga fa’apipi’i foi le Fa’atonu Sili o le Soifua Maloloina ia Leausa Samau Dr. Take Naseri i le fautuaina pea lea o le mamalu o le atunu’u ina ia fa’autagia fautuaga ua tu’uina atu, ina ia le gata mo le soifua maloloina, ae fa’apea foi ona fa’asao mai i manu’aga tugā o le tino, pe a lavea i se apa po’o ni u’amea ma’ama’ai.
E lē mafai ona tu’u le galuega a le Matagaluega, o le fautua ma soona fautua atu i le mamalu o le atunu’u, ina ia tausisia pea le tumama lautele mo le soifua maloloina o tatou tagata, aemaise lava o nai a tatou fanau, ina ia aua nei maua i ni fa’ama’i, o le fa’aopoopo lea a le Fa’atonu Sili o le Soifua Maloloina.
