O le a tuu toe eseesea le Pulega o le Falepuipui ma le Matagaluega o Leoleo i le Tausaga Faaletupe 2023-2024.
O Iulai 2022 sa faalauiloa ai e le Afioga i le Minisita ia Faualo Lefau Harry Schuster se fuafuaga a le Malo e toe tuueseeseina ai le Matagaluega o Leoleo ma le Pulega o Falepuipui ma le Ola Toefuataina.
I se faatalatalanoaga ma le Sui Komesina o le Matagaluega o Leoleo Papalii Monalisa Tiai-Keti, na saunoa ai Papalii, “O le Tausaga Faaletupe (Financial Year) 2023 i le 2024, o le a faamautu ai le fuafuaga e faatumaoti ai le Falepuipui ma le Ola Toefuataina (Prisons and Corrections) e vaaia e lona lava pulega.
O lenei faaiuga o le a tuuesea ai le Pulega o le Falepuipui ma ona lalā i Tanumalala, Olomanu ma Vai’aata, e aunoa ma se toe malu i lalo o le faamalu a le Matagaluega o Leoleo e pei ona iai nei.
O le pulega o falepuipui sa i lalo lava o le Matagaluega o Leoleo, peitai o le tausaga 2014 sa tuueseeseina ai nei auaunaga ma avatu ai le Falepuipui ma le Ola Toefuataina i lalo o se Pulega Tumaoti e vaaia i lalo o se faamalumaluga a se Komiti Faatonu (Governing Board of State Owned Enterprise).
O le manatu maualuga o le faatumaoti o le Pulega o Falepuipui ma le OlaToefuataina, o se talitonuga o le a siitia ai le auaunaga.
Peitai o Aperila 2020 sa toe suia ai lenei fuafuaga ina ua tulai mai ni faafitauli i totonu o le Pulega o Falepuipui ma tele ai ina toe valaau atu le Matagaluega o Leoleo e su’e ma toe faafoi pagota sosola ese.
I se faalavelave na tulai mai i le Aso 23 o Mati 2020, na faanatinati atu ai le Matagaluega o Leoleo ina ua tulai mai se vevesiga tele i le falepuipui i Tanumalala, ma sosola ese mai ai ni pagota e 36 mai le nofoaga (mass prison break).
O lena lava vaiaso sa faamavae ai le Pule Sili o Falepuipui ma le Ola Toefuataina, Taitosauā Edward Winterstein, ma fai ai le faaiuga o le a toe tuuina atu le auaunaga i lalo o le vaavaaiga a Leoleo.
E maoae ni aupega na maua atu e Leoleo, sa i totonu o sela taitaisi o le falepuipui, faapea ma aupega sa faaogaina e pagota i le taimi na sosola ese ai.
“As you can see o kolopa, o gaifi, samala, o paipa…there were cell phones found on some prisoners, and who knows what else is in there, so there is a lot of reform that needs to happen over at that prison”, o le saunoaga lea a Su’a Egon Keil ina ua tulai mai le faafitauli ma toe tuuina mai le pulega o le Falepuipui i Leoleo.
Sa toe maua uma e le Matagaluega o Leoleo nei pagota e silia ma le 30, ma toe faafoi atu i le falepuipui.
I le faaiuga ua faia nei e toe tuu eseese ai auaunaga, na saunoa le Sui Komesina ia Papalii Monalisa i le eseese o tiute ma matafaioi o le Pulega o Falepuipui, ma le Matagaluega o Leoleo.
“O le tiute o le Matagaluega o Leoleo, o le faamalosia lea o le tulafono, ma faia suesuega ma faatino moliaga iā i latou ua soli le tulafono.
“O Leoleo e nafa ma le puipuiga lautele o le atunuu, ae o le Ola toe Fuataina o le faatino lea o auala e toe afua ai se taeao fou mo i latou ua solia le tulafono (rehabilitation) ma mantau ai, o se itu lelei foi lea fuafuaga.”
E lata i le 400 le aofai o alii ma tamaitai o loo tuli faasalaga ma taofia i totonu o le nofoaga i Tanumalala. O le faaiuga o le tausaga talu ai e ova ma le 160 le aofai o pagota sa mafai ona faamanuiaina i le polokalame e agavaa ai ona fai kerisimasi i tua i aiga, faapea na nisi sa mafai ona o i tua mo le Tausaga Fou. Ua toe fo’i uma i totonu i latou e faamaea ona tuli a latou faasalaga.
