Faafetaia e le Lakapi Samoa le Aao Mafola ma le Alofa Tulai o le Paia ma le Mamalu o Samoa
02 Me 2023 Apia Samoa. E $284,000 le seleni na mafai ona faamaopopoina i le Aso Toanai na sei mavae atu nei ae e ono iai se siitaga i le fuainumera pe afai e maea ona faamaopopoina nisi o foai na faatoa taunuu mai.
I se faatalanoaga ma le afioga ia Seumanu Douglas Ngau Chun o le Lakapi Samoa (High Performance Unit Manager) sa fai ai o ia ma sui o le pulega a le Lakapi Samoa, le komiti faafoe faapea le ofisa sili ma le taitaifono, e faafetaia le aao mafola ma le alofa tulai o le paia ma le mamalu o le atunuu.
“Sa molimauina le taupati mai o le atunuu faapea tupu ma ee, o failauga ma tausi o loo alala ma papa’aao i soo se tafa e fia o loo taputapua’i ma susu’e le faamalama ma silasila mai i si ona atunuu pele o Samoa, malo le soifua, faafetai le agalelei..”
“Talitonu e le o puaao le lagi, e le o pogisa foi le lagi i lo outou titi faitama. O le matou tatalo ia saga foai atu e Le Atua ma toe faatutumu e Le Atua mea ua faagaogaoina ma to’esea ona o lo outou titi faitama.”
O loo fuafua le Lakapi Samoa e faia se leitiofoni i Amerika Samoa, aua lava se sailiga seleni mo le tapenaga a le Manu Samoa mo le ipu a le lalolagi.
Saunoa Seumanu Douglas Ngau Chun o loo latou fesootai ma le susuga i le Amepasa o Samoa ia Fata Brian Kaio faapea le afioga ia Taupa’u Tauileave Toluono, e faamautu ai fuafuaga faatino mo se leitiofoni i laufanua o le tatou motu tuaoi ia Tutuila.
Saunoa Seumanu, e ui ina ua ma’ea faatinoga e pei ona iai le sailiga tupe i le Malaefatu i Sogi, ae lē o nofonofo le Lakapi Samoa i auala mo le faatupeina o isi tapenaga e pei ona iai le taamilosaga i le vaiaso nei lea e tausinio ai le Manuma, faapea le au taitoafitu o loo malaga atu mo vae mulimuli o lenei tausaga, ae maise foi o le tapenaga a le Manu Samoa 15.
Na taua e Seumanu o le leitiofoni sa faatinoina e lei faapito lea tapenaga na o le Manu Samoa 15, ae o taaloga lakapi uma o loo tapena iai au a le atunuu,
O le Aso Lulu nei o le a amata ai se taamilosaga i le Apia Park lea ua faaigoaina o le Pacific Nations, lea foi e tausinio ai ma le tatou au lakapi o le Samoa A lea ua faaigoaina o le Manumā.
(758)
