O le aso Lulu 6 Aukuso sa faataunuu ai le fonotaga tuufaatasi faale-masina a le saofaiga mamalu a Sui o Nuu, Sui o le Malo ma Sui Tamaitai uma o Upolu.
O se avanoa tāua mo sui uma ma le Matagaluega o Tina ma Tamaitai, Atinae o Nuu ma Agafesootai, e talanoaina ai polokalame ma fuafuaga a le Malo i masina ta’itasi aua lo latou silafia aemaise o le faailoaina atu i tagatanuu uma o le atunuu.
Sa talanoaina galuega faatino e tusa o le tali mai a afioaga ma komiti a Tina ma Tamaitai, i le taulamua ai e faamama nuu aua le puipuiga mai le faama’i o le fiva ponaivi (dengue fever).
Sa faafetaia e le Matagaluega galuega sa mafai ona faatino faatasi ma le Saofaiga.
Sa latou asiasi i aiga taitasi o nuu, ma toe fautuaina malosi le faamamaina o le siosiomaga.
Ua faataatitia foi nisi o fuafuaga a le Malo mo le tali atu i lenei faama’i.
E pei ona saunoa le Pule Sili Lagolago ia Aufai Alan Aiolupotea, “E le mafai e le Matagaluega ona faatino e aunoa ma le tautua matavela a Sui uma o le Saofaiga, o e na filifili mai e afioaga taitasi, e fai ma o latou siufofoga ma sui vaaia.”
“E momoli atu le agaga faafetai tele ma le faamalo mo le tautua o loo faatinoina pea..”
O le isi fonotaga o le a faatino eseese foi fonotaga; Sui o le Nuu ma Sui o le Malo o le Aso Lua 2 Setema 2025 ae o Sui Tamaitai, o le Aso Lulu, 3 Setema 2025.
- Tuala Siaki Reappointed to Lead Gambling Control Authority for Another Three Years - October 9, 2026
- Faatoese le Palemia mo le Faaaogaina o le upu “Heil Hitler” i le 2007 - October 6, 2026
- 14 Ofisa Sili a le Malo na Faatautoina - September 23, 2026
