Na oo atu sui o le kamupani o le Pacific Ezy Money Transfer e le gata e faaoo atu la latou faafetai i le Malo ma le atunuu o loo gapatia i le taumafaiga o le faamai o le misela ina ia faaitiitia, ae o le faaoo atu foi o la latou fesoasoani e tusa lea ma le $10,000, e lagolago ai taumafaiga ina ia foia le sasao o lenei faamai i lo tatou atunuu.
Sa taua e le Pule Sili o le Pacific Ezy o Jeff Mahoney o le latou auaunaga e faaoga ma lagolagoina e tagatanuu Samoa i aso uma lava ma e taua tele ia latou lo latou tulai mai e fesoasoani i lenei taimi ao mafatia le atunuu.
O le oo atu o lea kamupani na faaleo ai foi lo latou agaga faamafanafana i aiga ua toesea le fanau i le maliu ma le oti ona o le misela.
O le susuga i le alii pule ma nisi o le pulega o le Pacificezy lea sa faaoo atu lenei meaalofa i le komiti o faalavelave tutupu faafuase’i.
Sa talia lea meaalofa e le tofa ia Ulu Bismarck Crawley lea o loo taitaifono i le komiti.
Na faailoa e Ulu le agaaga faafetai o le Malo i le tele o pisinisi ma tagata o lo tatou atunuu ona o le aao mafola ma le alofa i nisi o loo mafatia i lenei faamai, aemaise le lagolago i taumafaiga a lo tatou atunuu.
Na taua e le tofa ia Ulu e le’i mautu i le taimi nei se aofaiga o fesoasoani mai le lotoifale lava ia o lo tatou atunuu.
“Nei te’i ua vave avatu se tala i le taimi nei ae ou te iloa lava ua lata i le $300,000 meaalofa tupe mai pisinisi ma e alolofa i totonu lava o lo tatou atunuu”
Na taua foi o le tele lava o fesoasoaani o loo faao’o atu i lo latou ofisa o loo faasafua atu lea nisi o ia fesoasoani i wards ia o loo iai fanau o loo mafatia tele i le faama’i, ae i le taimi nei e le’o iai se fuafuaga a le Malo e faasafua se fesoasoani i aiga o fanau ia na maliliu, peitai na taua e Ulu, “Ae e ao lava ina tapena se faiga faapena.”
“O le faalavelave fo’i lenei e ese mai i faalavelave faalenatura e iai mafuie ma lologa o afa ma isi tulaga faapena, e iloa tonu lava le mea e agai iai le fesoasoani e pei o le faaleagaina o fale ma isi tulaga, peitai o le faama’i lenei pau le tulaga lea e agai iai o tulaga tau le soifua maloloina e pei o moega, ieafu, aluga, o taumafa ma vai mama.”
(2)
