Tusia: Marieta H. Ilalio
E tele mataupu taua i finagalo fa’aalia o sui tauva o itumalo fa’apalota eseese e le gata o Upolu nei a’o nisi foi mai Salafai lea na auai atu aua le resitalaina o o latou suafa e fa’amaonia ai le tauva mo le faigapalota o le tausaga fou i lalo o le fa’amalu a le Vaega Fa’aupufai a le HRPP.
O se tasi o sui tauva a le Itumalo o Lefaga ma Falease’ela ia I’a Sa’u Toeupu Kaisara lea na mafai ona fa’atalanoaina i sona finagalo i le mafua’aga ua ala ai ona a’e se tofa ia te ia ina ia alu i le faigapalota o le tausaga fou.
“E 7000 ma ona tupu tagata o lo’u itumalo o Lefaga ma Falease’ela, ae o’o mai i le taimi nei, e le’i iai ma se Falema’i Fa’aitumalo e tua iai le to’atele o nai tagata aemaise lava o le taimi o gasegase ma fa’alavelave fa’afuase’i,” o le saunoaga lea a I’a.
“Ae le gata i lea e ave lava lo’u mafaufau ina ia toe finauina mai eleele po’o fanua o lo matou Itumalo lea ua ave e le itumalo o Safata”.
E le’i mafai ona fa’alaua’itele mai e le afioga ia I’a po’o a tonu nei fanua ae po’o le a foi le tausaga lea na ave’ese atu ai e Safata e pei ona ia ta’ua i lana saunoaga.
“E iai lo’u popolega i tupulaga fai a’e o lenei itumalo ma o le ala lea o lo’u naunau ina ia finauina nei eleele ia toe fa’afo’i mai pe afai ae manuia lenei taumafaiga o le a alo atu iai”.
O I’a e le tau fa’ailo i nisi o tagata ona o ia o se tasi o fai pisinisi ua loa lana tautua i tulaga tau fefa’ataua’iga o fanua i lana pisinisi ua fa’aigoaina o le Kaisara Real Estate.
Saunoa I’a, o lea ua tatau ma onomea lona tauva i le faigapalota ona o lona talitonuga o le musumusuga lea a le Atua mo ia.
O I’a na ia fa’aalia o ia o se tasi o sui o sui tauva e to’atele lea ua fuafua mo le latou Itumalo ma e le’o mafai ona fa’amaonia mai i le taimi nei se fainumera mautu o ni sui tauva o lenei Itumalo o Lefaga ma Falease’ela.
O loo tu’u atu le masina atoa o Iulai e resitara mai ai nisi e fia tauva mo le faigapalota i lalo o le faamalu a le HRPP.
(0)
