E iai le talitonuga o se tasi o sui tama’ita’i lea ua sauni e tamo’e mo le faigapalota o le tausaga fou ma o ia foi o le ta’ita’i o le Vaega Fa’aupufai Fou a le Sovereign Independent Samoa (SIS), so’o se atunu’u lava e tatau ona malosi le atina’ega o afio’aga ma itumalo ae le na’o le taulaga.
O le tofa ia Fesola’i Logo Toloa ua 63 tausaga o lona soifua ma ua sauni e tamo’e mo sona avanoa i le nofoa a lona itumalo o A’ana Alofi No.1 lea e aofia ai afio’aga o Faleasi’u ma Fasito’o-Uta.
Ua saunoa le tofa ia Fesola’i Logo Toloa e faapea o le agaaga moni na mafua ai ona mana’o e fa’atu lenei vaega fa’aupufai fou, ona o le naunauta’iga e atia’e ele’ele o le atunu’u aemaise o le fa’avaeina o fuafuaga e manuia laugatasia ai Samoa atoa ae le na’o afio’aga tu taulaga.
I le manulauti po’o le menifeso a lenei Vaega Fa’aupufai fou, o lo’o ta’ua ai faanaunauta’iga ina ia fausia auala aga’i i fanua lafua e mana’omia ona galueaina ina ia tamaoa’iga ai o tatou tagata.
“Tatou eli aulo i o tatou eleele ina ia lava le taumafa paleni, e fa’atamaoaiga i lafu manu, ia fa’aleleia pisinisi tau fa’ato’aga ma alamanuia eseese ina ia le toe iai se Samoa e ola mativa,” o se tasi lea o vaega o le manulauti po’o le fisa faailoilo a le Vaega Fa’aupufai lenei.
O le isi itu na ave iai le fa’ataua a le SIS o le fa’amalosia ma fa’atamaoaigaina lea o Fono a Alii ma Faipule i tua i nu’u ma afio’aga e ala i le galulue fa’atasi ma faipule i Fono a nu’u ma o le a le toe iai se tulaga e fa’atalale ai ia sui Faipule.
“O le fausia o ni Faoa Aai e lima (5) i Upolu fa’apea ma Savaii. E le toe saili mamao nai nu’u i tua e saili fofo mai i le taulaga aua o le Malo o le a agai i nu’u i tua ina ia silasila toto’a i fa’afitauli o lo’o gafa ma nu’u ma Itumalo ma o le a fausia ai se “Town Council” e iai ofisa o auaunaga a le Malo e pei o le Ofisa o Leoleo, Soifua Maloloina ma isi itu fa’apena.”
Saunoa Fesola’i e fa’apea, ua mafua ona fa’amalosia lona loto e fa’atuina lenei Vaega Fa’aupufai fou, ina ia ta’u atu ai i le lalolagi, o Tina o “pae ma auli” e mafai ona fa’amafolafola mea uma e fa’apena ona fa’aletonu.
Ina ua fesiligia po’o le a se ata fa’ataitai o se fainumera o ni sui tauva o lana Vaega Fa’aupufai fou lea ua fa’asauni e resitala i le masina fou ae sa ia saunoa mai, e le’o mautinoa lea tulaga.
“O lo’u naunauta’iga, afai lava ae manuia taumafaiga a lenei vaega fa’aupufai fou, lona uiga le le tali mai a Le Atua, ae afai e leai ia ona ua pau lava, ae o le itu taua o lea ua fofola atu fa’anaunauta’iga a lo’u nei tina fa’atauva’a aua se manuia o lo’u nu’u, aemaise o Samoa,” o le saunoaga lea a Fesola’i.
O le SIS e valu iai Pati lea ua mae’a ona resitalaina mo le Faigapalota tele a le atunu’u i le aso 9 o Aperila o le tausaga fou.
