O le aso 8 o Iuni 2020 na faataunuuina ai le Fono poo le Aso Gafua masani a le nuu o Vaie’e ma talanoaina ai so latou Sui Tauva mo le faiga palota o loma nei ia Aperila 2021.
E tusa ai ma se faasalalauga a le afioaga, “O lea ua afatasi nei le tofa i le aiga Sa Te’o o lo’o afifio i le nu’u ma se faautautaga alualu mamao ia Safuiane ma Faleata, Sa’alo ma le Gataiala, faapea se moe i le Usoalii e tofia ai le Susuga ia TUIA LOGOIAI PU’A LETOA e fai ma Sui Tauva o le nuu o Vaie’e i le faiga palota ia Aperila 2021”.
O le Afioga ia Te’o Lomialagi Pelema Reupena na tulei saunoa i le tofa autasi a le aiga Sa Te’o ma momoli se fa’amanuiaga i le Susuga i le Tuia mo le alo atu i le faiga palota. O le fetalaiga ia Lealaimuna Teutupe ma Sagala Esera na fai ma sui o Safuiane ma Faleata, Sa’alo ma le Gataiala e folasia se fa’autautaga mamao ma se faamanuiaga aua le alo atu o le Susuga i le Tuia mo le fa’amoemoe.
I teuteuga o le Tulafono o Faiga Palota lea ua iai nei se suiga o le Itumalo Faa-Palota e aga’i iai le nuu o Vaie’e, i le amata mai lea i Niusuatia se ia o’o atu i Mulivai, ua ta’ua nei o Safata Sasa’e. O le faiga palota talu ai na aga’i ai Vaiee e palota i le Itumalo fa’apalota Safata i Sisifo.
O le tausaga 2015 sa talosagaina ai e Tuia, Anapu ma Afemata le suia o boundaries o le itumalo e afua mai ona o tulaga faaleaganuu i tua’oi o malae o Togamau ma Siulepa, lea ua talia e le Malo ma toe tuu mai ai loa Vaiee ma Niusuatia e palota i le itumalo o Safata Sasa’e o “Togamau” ma ona tua, e ese mai ia “Siulepa” ma ona tua. O le Susuga i le Tuia na saunoa i luma o le Palemene e folasia le Savali a le Itumalo Safata e uiga lava i lenei suiga.
O le Susuga ia Tuia o loo avea ma Sui Taitaifono mo le Samoa Airways i le taimi nei.
(1)
