O le taeao nei lea na faia ai se aliitaeao fa’apitoa a le Vaega Fa’aupufai a le Fa’atuatua i le Atua Samoa ua Tasi (FAST) i le apitaga o lo’o fa’apea ona fa’atasitasi ai lenei Pati ma sa mafai ona fa’ailoa aloa’ia ai e le latou ta’ita’i le afioga i le Sa’o Fa’apito ia Fiame Naomi Mata’afa le filifilia e Tuala Tevaga Iosefo Ponifasio o le FAST.
O lenei saunoaga a Fiame sa faia a’o le’i taumafaina lana ‘ava i le taeao nei lea sa ia fa’amanino ai, o le aso ananafi lea sa feiloa’i ai ma Tuala ma lona faletua i lona maota fa’atasi ai ma le afioga i le Sui Ta’ita’i ia La’aulialemalietoa Leuatea Polataivao Schmidt ma fa’ailoa atu ai e Tuala o ia ua ia filifilia le FAST.
“O le mea lona lua ou te fia fa’amalamalama atu i le tatou aiga, o le tulaga lea ia Tuala, sa fa’apea o le afiafi nei e avatu ai se fa’amatalaga e uiga ia Tuala o lo’o iai nisi fuafuaga lea e fa’atino, peita’i ona o lea ua tula’i mai le mata’upu lea anapo, mo tatou lava ia ia outou silafia o le aso ananafi na afio atu ai ia Tuala ma lona faletua matou feiloa’i i lo’u fale matou ma La’auli ta’u mai e Tuala o ia o le a sau..”
Na fa’ailoa le fiafia tele o sui uma o le FAST e ala i le patipatia o lenei fa’ai’uga e pei ona fa’ailoa e le ta’ita’i ia Fiame e ui e le’i faia se feiloa’iga atoa a le Vaega Fa’aupufai ma le afioga ia Tuala.
E pei ona silafia, o Tuala lea na fa’atalitalia e vaega fa’aupufai uma e lua o le FAST ma le HRPP po’o le a sona finagalo i se Pati o le a ia filifilia ina ua mae’a a’e le faitauga aloa’ia o le faigapalota tele a Samoa o le 2021, o lo’o tutusa nofoa o lo’o maua e Pati nei e lua e ta’i 25.
Peita’i o le po anapo lea na faia ai se fa’asalalauga e le Komesina o Faigapalota ia Faimalomatumua Mathew Lemisio i luga o le Facebook ma faailoa mai ai, ua sainia e le Ao o le Malo ia Tuimalealiifano Va’aletoa Sualauvi II, le avea o Aliimalemanu Alofa Tuuau ma sui faipule o le Palemene e fa’aatoa ai le 10 pasene o le aofa’iga o Tina ua filifilia mo nofoa o le Fono Usu a Samoa mo lenei paea’iga.
O le ala lea na saunoa ai Fiame e fa’amalamalama i le latou Pati ia le latou feiloa’iga ma Tuala ma lona faletua lea ua fa’amaonia ai o le a auai i le fa’amalu a le vaega o le Fa’atuatua i le Atua Samoa ua Tasi. E toa 26 ai loa le Vaega a le FAST, ae toa 26 foi le Vaega a le HRPP, i le filifilia ai o Aliimalemanu.
Ua tula’i mai ai nei ua toe tutusa nofoa mo Pati nei e lua a le HRPP ma le FAST ma fa’atalia ai nisi o mata’upu tau faigapalota ua mafai ona tu’uina atu i luma o le Fa’amasinoga lea o le a fofogaina i le mae’a o le 10 aso faigaluega ua tu’uina mai e le Tulafono e fa’auluina atu ai ni tagi a ni sui tauva o le faigapalota.
Sa saunoa foi Fiame, o le a ave i luma o le Faamasinoga le faauigaina o Tulafono, pe moomia se isi sui tamaitai, pe lei atoa i le toalima lea sa manumalo mai le palota tele.
- Hearing Date Set for Four People Charged with Sexual Acts on Woman with a Disability - October 5, 2021
- Two Sasina Matai Charged with Uttering Threatening and Insulting Words - October 5, 2021
- Male Prisoner at Tanumalala Pleads Guilty to Acts of Sodomy - October 5, 2021
