O le aso Lulu na ma’ea ai le lima vaiaso o suesueina le mataupu o loo tuuaia ai le afioga ia Laaulialemalietoa Leauatea Polataivao Schmidt, Fepuleai Faimata Sua, Li’o Faataumalama Auava, Lise Marie Schmidt, Samuelu Leau Su’a ma Sivai Kepi.
Ina ua maea molimau e silia ma le 70 a le itu a leoleo, na tuuin atu ai loa le avanoa i le Itu Teteee.
Peitai na tula’i uma loia a ē o loo molia ma faailoa i luma o le faamasinoga, e lē tula’i nisi o i latou e tuuina atu ni a latou molimau tuu fofoga i luma o le Faamasinoga.
E toatasi se molimau a le itu a leoleo sa fofogaina i le aso ananafi ma o le molimau fo’i lena na taualuga iai iloiloga.
O Poufa Asio sa fofogaina lana molimau e faaaogaina ai fesootaiga faatekonolosi (zoom) mai Ausetalia.
I le molimau a Poufa, o ia sa malaga mai Samoa i le maliu o lona tuaā ia Setema 2023, e tuaoi o latou fale i Vaitele ma le fale sa nonofo ai Samuelu ma Sivai.
I lana molimau sa faapea mai, e faateia o ia i le oo atu o leoleo ma suesue o ia e faapea na tā’ua lona igoa e Sivai i lana faamatalaga mo lenei mataupu.
Ua tuuaia e faapea – e masani ona la ō la te savalivali i afiafi e toleni. Ma o i la na faamatala ai e Sivai le taavale a Leala lea na tupu ai le faalavelave. E faamatala agai i le molimau ia Poufa.
Peitai na teena malosi e Poufa lea faamatalaga ina ua tuuina mai lana molimau.
Ae ua ta’ua e Poufa e leai lava se aso na la savalivali ai ma Sivai e toleni. Ae na te leiloa foi lea faalavelave, ma e leai foi sona aafiaga i lea faalavelave.
Na tulai le tamaitai loia ia Kathryn Dalziel o loo tulai mo Samuelu ma Sivai ma fesiligia Poufa, “E sa’o pe a ou faapea atu, o leoleo na faiatu ia te oe o Sivai sa ia ta’ua lou igoa, lea ua mafua ai ona e molimau i lenei mataupu e aunoa ma sou silafia? Ae tali Poufa, e sao o leoleo na faimai na ta’u e Sivai lo’u igoa.
Na ma’ea ai loa fesili a Kathryn mo Poufa Asio, ma taualuga ai loa molimau a le itu o leoleo.
Ina ua tuuina atu mo le itu tetee ae tulai mai Richard Marchant o le loia mo Laaulialemalietoa, Fepuleai Faimata Sua ma Lise Marie Schmidt – ma faailoa i luma o le faamasinoga e leai se molimau a i latou uma nei e tuufofoga i luma o le faamasinoga.
E faapena foi mo Maposua Tanya Toailoa o loo tulai mo Li’o Faataumalama Auava, faapea foi se talosaga a Kathryn Dalziel e leai foi se molimau a Samuelu ma Sivai e tuu fofoga i luma o le faamasinoga.
Na faafetaia e le afioga ia Talasa Atoa-Saaga itu uma o le faamasinoga mo le onosaia o le lima vaiaso sa faasolo ai taualumaga ma iloiloga.
Ua faatualaga ai e lana afioga le Aso 5 o Setema e tatau ona tuuina atu ai folasaga mulimuli a loia (final submissions) ae o le Aso 6 Oketopa 2025 e folasia ai le faaiuga o le faamasinoga.
Avanoa Faigaluega
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
