Fia Sui le Loia a lē ua Ioeina Moliaga o le Fuafua e Tagatavaleina le Palemia

0
4208

Ua faailoa e Taualai Leiloa Tuilaepa lona le fiafia i lana loia ina ua tulai i luma o le Faamasinoga Maualuga o Samoa i le vaiaso nei.

O Taualai o se alii mai Maagiagi o loo faiava atu i le afioaga o Laulii, o loo faasaga iai moliaga o le taupulepule e tagatavaleina le Alii Palemia o Samoa, le Susuga ia Tuilaepa Sailele Malielegaoi.

Sa muamua lava tulai faatasi Taualai, Malele Paulo aka King Faipopo ma Lema’i Faioso Sione i luma o le Faamasingoa Maualuga ia Setema 2019 ma ia ioeina ai moliaga a leoleo. Sa teena ma o loo teena pea e King Faipopo ma Lemai Sione nei moliaga.

L-R: Lema’i Faioso Sione, Taualai, Malele Paulo poo King Faipopo.

Ina ua tuuina mai le tali ioe a Taualai, sa faatonuina e le Faamasinoga Maualuga o ia  e tatau lava ona iai sana loia.

Sa toe tulai Taualai i le Faamasinoga ia Oketopa 2019 ma lana loia e totogi e le Malo (legal aid), le tamaitai ia Sarona Ponifasio, ma suia ai loa lana tali mai le Guilty i le Not Guilty. Ua ia aveese le ioe, ae talosaga le fia teena o moliaga.

Sa tuu atu loa le mataupu e suesueina e le Faamasinoga i le Aso Faraile na tea nei 7 Fepuari 2020 ae peitai, sa toe tulai le tamaitai loia ma tuuina atu le tali, ua toe sui foi le tali a Taualai mai le Not Guilty i le Guilty. Ua ia toe foi i lana tali ae lei faia sana loia, o le taliaina lea o moliaga.

Sa tulai Sarona Ponifasio i lea aso e momomi le finagalo o Taualai e toe sui lana tali. I le folasaga a le loia sa ia faapea atu ai i le Faamasinoga, o Alii ma Faipule a le afioaga o Laulii ua alai ona toe sui le tali a Taualai.

“Put pressure on my client”.

O Taualai o loo faamoemoe e fai ma molimau a le itu a leoleo i le taimi e moliaina ai e sa fuafua faatasi e tagatavaleina le Alii Palemia. O le afioaga o Laulii sa latou muamua lava logoina leoleo i lenei mataupu ina ua maua e Alii ma Faipule faamatalaga ma faamaumauga o le tapenaga (conspiracy).

E mavae atu le Aso Faraile lea ua toe ioeina ai e Taualai ana moliaga, ae sosoo loa ma Aso Toonai sa vaaaia ai loa se facebook live e faamatala ai lona lē fiafia i lana loia.

“Ua manao la’u loia e toe loka a’u ona ua le fiafia fo’i la’u loia ua ou alu atu fo’i toe fa’afo’i le mataupu i le mea sa iai i le amataga:

“E iai nai mea o lea ou te iloa, o lea e i tua atu o la’u loia, atonu e mulia’i se taimi tou silafia, o lea e lumanai lau faamasinoga i le Aso Lua. O lea ua ou tapena atu atonu o le a taunuu ai le mea lea e aumai e le Alii i lo’u mafaufau e tapē ai faufauga ma mea ia e faapolokiki mai i tua o la’u loia lea ua ou mauaina i le taimi lenei ma ua ou malamalama lelei foi iai”

I le toe tulai ai o Taualai i le Faamasinoga Maualuga i le Aso Lua o le vaiaso nei, sa ia talosagaina ai le Faamasinoga e fia sui lana loia.

Peitai sa tali le Faamasino ia Tafaoimalo Leilani Tuala-Warren, o mataupu na e fesootai ai lava ia ma lana loia, e le aia iai le Faamasinoga.

Ua talia e le Faamasinoga le ioe atu o Talai Leiloa i ana moliaga ma o le Aso 2 o Novema 2020 o le a lauina ai lona iuga.


Maina Vai