Fesoasoani le SSAB mo le Sosaiete Kanesa

0
35

O le foai a le SSAB mo le Sosaiete a le Kanesa i Samoa o se foai e faifai pea, ma ua ono nei tausaga e pei ona uluai amata ai i le tausaga 2013.

O le taeao ananafi na tuuina atu ai e le SSAB le $1000 tala mo le sosaiete.

E maua mai lenei seleni i le toesea mai lea o se vaega tupe mai le tau o se oloa o loo faatauina e le mamalu o le atunuu, ma tuuina atu lea mo le Sosaiete o le Kanesa i Samoa, aua a latou taumafaiga ina ia tafi ese lea faama’i mai o tatou tagata.

O lenei seleni sa maua mai ina ua faatauina e pisinisi ma tagata lautele le pepa poo pepa e faaoga mo galuega (A4) ma o le tau o lea pusa pepa e toese mai ai le $5 tala mo le faamoemoe lenei.

E 142 pusa pepa sa taulia atoa ai ma le 5% sa toese mai i oloa piniki sa faatauina e le atunuu, tuufaatasi ai lea ma le fesoasoani a le SSAB e faaatoa ai e $1000 lea ua foaiina.

Sa taua e Asomua Alosio Stanley o le sui o le SSAB e faapea, o le tele o matagaluega ma ofisa o loo fai sao i nei foai, o loo lava ma totoe pepa mo galuega peitai, sa taumafai lava e faatau nisi pepa, ona o le lagona alofa i o tatou tagata o loo aafia i lenei faamai.

Sa talisapaia e le Sosaiete, ma faailoa ai e le Pule Sili ia Shelly Burich e le mafaia e le sosaiete ona faia ni galuega se tele pe ana aunoa ma le fesoasoani mai a lo tatou atunuu.

E sili ma le 40,000 sa mafai ona aoina i le faalauiloa lava ia o le Pinktober, peitai o le taimi nei o loo solo atu lava le foai mai nisi o le atunuu. O lea aofaiga pe a ma le $6,000 i le $8000 le faasili mai le tausaga ua mavae.

Taua e Shelley e le o o le seleni e taua, peitai o i tonu e iloa ai le faataua e le mamalu o le atunuu le nofouta i aafiaga leaga o lenei ma’i o le kanesa.

O le oo atu o tagata ma tauaaoina pepa o faamatalaga e faailoa mai ai o loo manaomia lava e le toatele tulaga o faamatalaga manino e faatatau i le kanesa ma lona aafiaga i o tatou tagata.

Mo le faleoloa o le SSAB na taua e le sui o le sosaiete o le kanesa le agaga faafetai ma talisapaia le foai pea i tausaga taitasi, e le gata o loo faatau ina atu a latou oloa, ae o loo ofoina atu foi le isi galuega tele, o le taumafai e faailoa aafiaga o lenei mai leaga o le kanesa ina ia faasaoina tagata o lo tatou atunuu.


Maina Vai

Maina Vai of Fasitoouta is a mother of five. Maina has recently graduated with a Certificate of Customary Adjudication from the National University of Samoa.
Maina Vai