Fesoasoani le Faletupe o le National Bank i le Au Siisii a Samoa

O le Pule Sili o le National Bank of Samoa, le susuga ia Sam Swan sa ia tauaaoina le fesoasoani e $10,000 tala.

0
230

E sefuluafe $10,000 se tino i tupe ua foai e le Faletupe o Tagatanuu o Samoa, le National Bank, mo le au siisii a le atunuu auā a latou tapenaga mo taamilosaga o loma nei.

O le Pule Sili o le National Bank of Samoa,  le Afioga ia Papalii Samuel Swan, sa ia tauaaoina le fesoasoani i le Peresitene o le Au Siisii a Samoa, Tuaopepe Asiata Jerry Wallwork.

Saunoa Papalii, sa maitauina lava soo se faatinoga a le au siisii i taamilosaga e auai ai, le maualuga o le tapulaa o loo tausinio ai, ma o se fiafiaga tele lea.

Saunoa le Pule Sili ia Papalii, o loo vaaia pea le tele o taimi e faimalaga ai le au siisii, e moomia le fesoasoani ona o le faatupeina o pasese i vaalele, ae maise o tau o fale e faamautu ai i taimi o taamilosaga, ma isi lava mau tapenaga.

“O lea ua manatu ai e tatau ona faatino so matou sao e fesoasoani ai i tapenaga a le au siisii a Samoa..”

Saunoa Papalii, “O se fiafiaga tele lea i le faletupe, ina ua avea matou o se kamupani e lagolagoina le au siisii a le atunuu,”

Na tali fuaitau le faiaoga poo le Peresitene foi a le ausiisii, le afioga ia Tuaopepe Asiata Jerry Wallwork e momoli le faafetai i le National Bank.

Saunoa Asiata, o le faigapa’aga ua amatalia nei, e manatu o le a fa’aauauina pea.

“O le motto a le au siisii, finau mo le pine auro – go for gold ma ua avea le faletupe o le NBS, o le Golden Bank..

“E momoli ai le faafetai mo lenei foai taua.”

O le masina fou 5-7 Oketopa, o le a talimalo ai Samoa i le taamilosaga o le Oceania Youth, Junior and Under 23 Weightlifting Championship 2023.

Ae o le vaiaso nei, 28 Setema – 4 Oketopa o loo faia ai le Pacific Elite Training Camp e talimalo ai foi le Ausii a Samoa i lo latou High Performance Unit i Tuanaimato.