Fesoasoani le ASA Foundation mo mātua o se pepe 3 masina na maliu le misela

0
186
ASA donates a baby coffin and covers all funeral costs for Hicks family.

O le taeao ananafi i le falemaliu o Sefo i Motootua sa tuuina atu ai le fesoasoani a le ASA (Asa le Ala) Foundation mo le pepe 3 masina lea sa maliu i le vaitau o le Kerisimasi nei i le faamai o le misela.

O le fesoasoani sa tuuina atu lea i matua o Salvation Hicks, o lona tama ia Tupu Hicks ma lona tina ia Lisa Hicks.

Tupu ma Lisa Hicks

O le pusa maliu e teuina ai le tino o le fanau faatasi ai ma le pili o le falemaliu.

O le fesoasoani lenei a le ASA Foundation ua i le vaiaso lona valu lenei talu ona faatino mo e ua maliliu ona o le faama’i o le Misela ma lona pepesi ai i lo tatou atunuu.

Foai a le ASA Foundation

O le tofa ia Tele’ai Edwin Puni sa fai ma fofoga o i latou ua ofo le soifua e galulue fua mo le faamaopoopoina o fesoasoani mai tagata o loo aumau i Niu Sila o loo fai ma sui o le ASA Foundation.

E ui ina lei vaai ma pa’i atu i le fanau ua avea le ola, ae o lagona tiga o le alofa, sa vaaia i le taeao ananfi ina ua fetalai Telei’ai e faao’o le galuega a le ASA Foundation.

Teleiai ma sui o le ASA Niu Sila

“Tupu ma Lisa, ua maua tala ua maliu lo oulua alo, o faamaisega a le ASA Foundation ona o le fanau ua avea i le faamai, e le mafai e sa matou tala ona aveesea le loimata maligi ma le mafatia ia te oulua, ae ua na o se fesoasoani, e itiiti ae ia avea o se fesoasoani i o lua mafatiaga;

“E talavou lo oulua aiga, e le faigofie le lagona pe a avea le fanau, ae o lea ua tapena mai e le ASA Foundation mai Niu Sila e ala i le fesoasoani i latou na alolofa mai le pusa maliu faapea ai ma le pili o le falemaliu mo Salvation.”

O le tama ia Tupu Hicks 28 tausaga o le soifua mai Matautu Uta, na tali mo le fesoasoani. Sa molimauina foi foliga o le faanoanoa, pei o se tagata o loo amo se avega e mamafa, ma ua loa foi mafatiaga na vaaia i le tama, i le umi o tau faatali sana tala.

Tama o Salvation, o Tupu Hicks

“O nisi o tamaiti o lo matou aiga na pesia mai le faamai a’o iai i Nofoalii, lea sa mafua ai ona pesia Salvation;

“E faigata ona faagalo pe a manatu i tiga o le fanau ma le tele o taimi sa aumai ai i le falemai, ae mulimuli ane ua le toe aoga iai se togafiti, ona na fai mai fomai Ausetalia ua tuai ma ua le mafai ona togafiti le siama ona ua o faatasi ma le niumonia.”

O loo faamoemoe Tupu ma Lisa e malaga atu i Savaii i Fagae’e mo le teuina ai o le tino mliu o lo la alo, ma o le aso 14 o le a fai ai le sauniga faaleaiga o Salvation, ae o le vaa usu i le aso 15 o le a malaga atu ai i Savaii.

Na amata taofia mai Salvation i le falemai o Tupua Tamasese Meaole i Motootua i le Aso Gafua 23 o Tesema 2019. Sa fai Kerisimasi ai Salvation i le falemai ae na uma lona ola i le Aso 2 o Ianuari o le tausaga nei. O le sefulu ai lena o aso o taofia o ia.

O Salvation Hicks o se tasi o le fanau e toalima a Tupu ma Lisa Hicks.

Foai le pusa maliu

Maina Vai