Fesoasoani le ASA Foundation i Tama Fanau a Samoa Galulue Faavaitaimi

0
227

 

Ua fesoasoani atu le ASA Foundation i ni alii se 14 o loo faigaluega i lalo o le polokalame o tagata faigaluega faavaitaimi i Niu Sila e ala i le tuuina atu iai o nai pusa meaai mo i latou.

Na faaalia e le Peresitene o le ASA Foundation ia Telei’ai Edwin Puni, na aapa mai le latou faalapotopotoga ina ua fesoota’i atu i latou nei mo se fesoasoani.

O le faamatalaga a Telei’ai o alii nei sa faigaluega nisi i le SEEKA ma sa nonofo i Hastings, ae ua maea le tai 6 masina sa galulue ai. E faapea sa toe saili e le malo o Niu Sila nisi galuega e galulue ai i latou nei ona o lea ua le mafai ona toe foi mai i le tapunia o malaevaalele.

“E fua le iai o galuega i lea vaiaso ma lea vaiaso i le manaomia e faatoaga pe leai fo’i, ma e fua fo’i iai tupe maua. O se tulaga ua faaitiitia ai a latou tupe maua.”

O nei food parcels o se fesoasoani a le Malo o Niu Sila mo soo seisi lava e manaomia ona o aafiaga o le Koviti-19.  O lea la sa talosagaina ai e le ASA, ma momoli atu ai loa i Tepuke, i le nofoaga o loo iai le aufaigaluega lē tumau.

Sa faaalia e Telei’ai,  o se tasi o alii sa vaai i galuega a le ASA Foundation i le taimi o le misela, ona fesootai atu ai loa lea, pe faamata e agavaa i latou i ia fesoasoani.

Sa fesoota’i loa le ASA Foundation i le South Seas Healthare i Otara o loo latou tufatufaina is fesoasoani, ma maua ai loa pusa meaai nei.

I le polokalame a le Alii Palemia i le Aso Tofi sa ia  faamanino ai ua iai nai suiga, ma e silia i le 300 tamafanau a Samoa lea sa auina atu i galuega faavaitaimi lea o le a toe faafoi mai ona ua maea galuega sa iai.

Sa saunoa mai le Palemia, ua aafia lenei Polokalame o Galuega Faavaitaimi ona to le paū o le tamaoaiga o Niu Sila i le Koviti-19.

“E iai nai mala pagā ia ua tulai mai, o mea sa lei faamoemoeina is aafia ai fanau  ia a Samoa;

O le mea la ua tupu, ua tu le pituli i le economy fo’i o Niu SIla ia, ma tagata faigaluega”.

Ua avea le leai o ni galuega i totonu o Niu Sila ma tulaga ua toe foi ai tagatanuu Niu Sila i galuega mamafa ia latou le mananao iai.

“E pei la o le vaega foi ia paie, lea la ua toe tiotio ma toe o a’e e faigaluega i mea ia e galulue ai o tatou tagata. O lea la e pei ua tupu a’e ai se manatu o le a faamalolo ai lā le isi vaega o tatou.”


Maina Vai