Fesoasoani le ACC e Faaleleia Atili le Auaunaga a le FESA

0
69
O le taeao nei na tau’aao ai se foai o masini pueata i le ea (drones) mo le Pulega o Tineumu ma Faalavelave Faafuasei a Samoa poo le FESA. O lenei foai na tauala mai lea i se faigapa’aga a le FESA ma le Faalapotopotoga o Taui o Faalavelave Faafuasei poo le ACC. Saunoa se tasi o faauluuluga o le ACC, Tuatagaloa Fagalima, o le agaaga maualuga ia mafai ona tali atu i manaoga a le FESA mo taimi e tali atu ai i faalavelave ae maise taimi e moomia ai e le mamalu o le atunuu se fesoasoani. O le sini autu, ia mafai ona lavea’ia se soifua.
Sa saunoa foi le sui o le SkyEye sa auai i le faamoemoe, o i latou o le a faafoeina le aoaoina o sui o le FESA mo le faaogaina o nei masini pue ata.  O nei drones e iai le “eBee e mafai ona tusia faafanua ma faailoga tulaga tau mapping. O le Maverick Enterprise 2 Advance e faaoga mo ata e pueina ma surveillance, faapea foi ma le Phantom 4.
Na tali faitau le afioga ia Tanuvasa Petone Mauga, o ia o le Komesina o Pulega o Tineumu ma Faalavelave Faafuasei a Samoa.  Sa ia saumoa ua faatumulia o ia i le agaaga fiafia ona ua tau le miti sa miti iai, ma ua leva foi o faa’nanau se masini faapea, peitai, o lea ua tali mai talosaga. Sa ia faafetaia ai le latou faigapa’aga ma le ACC, ua mafai ai ona maua se masini e faafaigofie ai le faatinoga o le auaunaga mo Samoa.
Masini Drones ua foai e le ACC mo le FESA.
Saunoa foi le Komesina, e faafetaia le kamupani o le Skyeye, ona o le tuuina mai o le latou tau’au, latou te faatino ai aoaoga mo le faaaogaina o nei masini. O saunoaga mulimuli a Tanuvasa, o le a faia ma le faaeteete le faa’aogaina o nei aseta tāua.