Fesoasoani le Ekalesia SDA i soo se aiga ua leai ni maumaga sā tua iai

"O taumafa fo'i ma fesoasoani ua tuuina atu e lē o faapito mo na'o aiga e lolotu i le Ekalesia.."

0
709

E silia ma le $30,000 tala le tau atoa o se foai o mea taumafa sa tapena ma tuuina atu e le Ekalesia SDA (Seventh Day Adventist) mo nisi o aiga mafatia mai le afioaga o Leauvaa.

O le saunoaga lea a le Taitai o le Matagaluega a Upolu ma Tokelau, le Susuga i le faafeagaiga iā Pastor Olive Dean.

Saunoa Olive, “O le aapa atu a le Ekalesia e tuuina atu fesoasoani o taumafa i aiga ua mafatia ma leai se mea e tua iai, o le tasi o lea polokalame fa’aauau a le Ekalesia e pei ona iai le ADRA.

O taumafa fo’i ma fesoasoani ua tuuina atu e lē o faapito mo na’o aiga e lolotu i le Ekalesia.

“O le tuuina atu o taumafa, o loo faasafua i soo se tasi, tusa lava poo lea le tapuaiga, pau le itu o loo vaavaai iai le Ekalesia o le tulaga mafatia o aiga ua leai ni faatoaga poo togalaauaina sa tua iai ma tausi ai le itu fofoga taumafa.”

O taumafa sa faamaopoopoina na aoina mai lea i Ekalesia Aso Fitu uma i Upolu nei.

O taga araisa, pusa fagu ma paelo gao, taga suka, falaoamata, masima, aufa’i, talo, taamu, pusa saimini, pusa apa, ma le tele o isi taumafa tuu apa.

Saunoa foi le susuga i le faafeagaiga, “O loo tilotilo le Ekalesia i se foai faapea foi mo aiga o le afioaga o Levi Saleimoa ma nisi aiga oTuanai sa aafia.

O isi ia o afioaga o loo aafia i le toe faafoiina o fanua o Afega e tusa ai ma faaiuga o Faamasinoga o Fanua ma Suafa sa tuuina mai.

Na faamanatu foi i le saunoaga a le Susuga ia Olive, “E le aiāina lava e le Ekalesia tulaga o finauga o loo tulai mai i le va o afioaga.

O le pau lenei, o loo iai aiga o loo aafia, lea o loo fesoasoani atu ai i soo se aiga o loo fia maua se fesoasoani.