Fesiligia le Tutoatasi o le Suitauva mo le Palota Laititi

0
2899

 

Ao sauni atu le atunuu mo le faigapalota laititi, o loo fesiligia pea e Laaulialemalietoa le moni o le tutoatasi o le sui o loo la tauvaina le nofoa o Gagaifomauga Numera 3 i le Aso 28 Aukuso 2020.

E toalua sui tauva mo lenei faamoemoe – o le Afioga ia Laaulialemalietoa Leuatea Polataivao Schmidt mai le afioaga o Sasina mo le vaega faaupufai o le FAST, ma le sui o Aopo, le Afioga ia Fa’aulusau Simi Laulua, o lo’o alu fa’asuitauva tuto’atasi (Independent).

Sa muamua lava saunoa le Afioga i le Alii Palemia, le Susuga ia Tuilaepa Sailele Malielegaoi, ao lei tapunia le resitara mo sui tauva; o le a tapuai le HRPP, ma e leai so latou sui tauva. (Lipotia SGN 29.7.2020)

Sa toe faamanino mai foi e le taitai o le HRPP ina ua fesiligia e nisi po’o ai sa’o le vaega fa’aupufai o lo’o tauva mai ai Faaulusau Simi, ma toe tali foi Tuilaepa i luga o lana polokalame ma nisi o tusitala, “E leai se sui a le HRPP mo lea fa’amoemoe a Gagaifomauga No.3 ma o le alii lea (Fa’aulusau) o lo’o alu fa’asuituto’atasi ma e masani ona tauva fa’atasi ma La’auli i lalo o le fa’amalu a le HRPP i le tele o faigapalota ua te’a”.

“Ua laki o le vave ona fa’asilasila aloa’ia le matou fa’ai’uga lea se manu e fa’apea foi La’auli o le matou sui ia le alii lea,” o le isi lea saunoaga a Tuilaepa.

Peitai ua saunoa Laauli, o Faaulusau la te tauva soo lava ma e alu lava I lalo o le HRPP, ma e fiu lava e nana, ua uma ona faailo e Faaulusau, o lo latou afioaga o Aopo e lagolago uma i le HRPP.

“Pau la’u tala e fai atu, e ala ona faapea mai ana saunoaga, e musu e mataga le ma o ma se sui o le HRPP, ae faiaina mai i le palota.

Sa tamomoe faatasi Laauli ma Faaulusau Simi i le faigapalota o le 2011, ma manumalo ai Laauli i ni palota se 627, ae 260 palota a Faaulusau.

O le taimi nei ua mae’a ona resitaraina se vaega fa’aupufai fou a le afioga ia Laaulialemalietoa ma nisi o tamalii o le atunu’u, lea ua fa’aigoaina o le FAST Political Party (Faatuatua i le Atua Samoa Ua Tasi).