Ua fesiligia se faaiuga a Alii ma Faipule o Falelatai, ua latou teena ai ma faasaina ona oo atu se faalauiloa mai soo se vaega faaupufai, e ese mai le HRPP.
Ua faailoa mai e le Taitai o le vaega faaupufai o le Samoa Ua Potopoto, le afioga i le Sa’o Faapito ia Fiame Naomi Mataafa, le tuuina atu lea o se tusi mai Alii ma Faipule o le afioaga o Falelatai, e faailoa atu ai lena faaiuga.
Ua saunoa le Palemia Tausi, ailoga e talafeagai ae maise o le aiā tatau o tagatanuu Samoa e palota saoloto ai, faapea le aia tatau a Sui Tauva – ua aafia tele i le teena ai e Alii ma Faipule o Falelatai, o soo se faalauiloa mai isi Vaega Faaupufai poo ni laupapa faailoilo foi a Sui Tauva.
Ua faailoa mai e le taitai o le Malo Tausi poo le Taitai o le Samoa Uniting Party, ua ia tuuina atu se tusi i le Komesina o Faigapalota i sona finagalo, poo fea o taoto ai le Tulafono o Faigapalota.
Saunoa Fiame, “O le Aso Lulu 22 o Iulai na taunuu mai ai le tusi a le Aiga Tauaana o loo faailoa mai ai le teena lea o nisi faalauiloa mai soo se isi lava vaega faaupufai, poo ni laupapa faailoilo ona afea totonu o Falelatai – mai Siufaga se’ia oo atu i Matautu, ona ua tasi lo latou finagalo i le sui o le HRPP..”
“O se tulaga ua aafia ai le saoloto o le tagata e faatino ai lana aiā tatau poo lana palota..
“E aafia ai fo’i tapenaga a Sui Tauva ae faapea foi aafiaga o vaega faaupufai o loo tapena e faalauiloa fuafuaga poo a latou anavatau.”
O le vaiaso ua te’a nei sa tuuina mai ai se finagalo o le Komesina o Faigapalota le afioga ia Tuiafelolo Toleafoa John Stanley, e fautua ma tuualalo mai ai le atunuu – O le palota e faatino i le filifiliga saoloto.
Na saunoa le Komesina o Faigapalota, o se solitulafono le taotaomia o finagalo o le atunuu ma ni gaioiga e taofia ai le filifiliga saoloto o soo se tagatanuu.
Peitai, o le tulai mai o le tusi a le Falefitu, ua manatu ai le Palemia Tausi, ua taomia ai le aiā saoloto o le tagata soifua e faatino ai lana filifiliga.
Ua faailoa foi e Fiame, “A fesili poo ai lea e fa’aao ai Samoa, O le Tama Tau Aana.”
Saunoa Fiame, ua tuuina atu lana tusi i le Ofisa o Faigapalota ae kopi ai Taitai o isi Vaega Faaupufai, auā e manatu Fiame, atonu ua tofu uma Taitai o Vaega Faaupufai ma a latou tusi mai Alii ma Faipule o Falelatai.
Ua faamauina foi, e tofu uma Vaega Faaupufai e pei o le FAST ma le SUP, ma lo latou Sui Tauva ua mae’a ona resitalaina mo le itumalo o Falelatai ma Samatau.
Na faamanino foi e le Sa’o Faapito, sa iai foi se tulaga faapena na tau tulai mai i lona itumalo o Lotofaga, peitai, o lana tuualalo, o le palota o le filifiliga saoloto… lea lā na tatala ai le avanoa mo sui o isi vaega faaupufai o loo tauva nei i le faigapalota.
O le itumalo o Falelatai ma Samatau o loo tauva mai ai le afioga ia Lupematasila Galumalemana Tologatā Tile Le’ia, sui o le HRPP lea sa ia uumia le tofi o le itumalo i le paeaiga talu ai nei.
O Teleiai Christian Ausage, o le sui mai Samatau o loo tauva mai i le fu’a a le Faatuatua i Le Atua Samoa ua Tasi (FAST).
Ae o le afioga ia Faalava’au Fasitau Ula, o le Sui Tauva lena o le Samoa Uniting Party poo le Samoa Ua Potopoto.
Ua toe nei o nai vaiaso taunuu Samoa i le Aso 29 o Aukuso ae o loo matauina pea le feainai o le atunuu ae maise o le tau faaleaga o le au lagolago (supporters) a isi vaega faaupufai – e faasagatau atu i le au lagolago a isi vaega faaupufai.
E le fou foi le tulaga lea o le iai o nisi o aiga ua faatetea mai nuu, ma faatula’i ese ona o le palota, ma e iai foi nisi o aiga ma afioaga ua va le fogavaa ona o le eseese o Sui Tauva poo Vaega Faaupufai o loo latou lagolagoina.
Vacancies
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
