O se finagalo lea a le Taitai o le HRPP le susuga Tuilaepa Sailele Malielegaoi, ua ia fesiligia ai le auaunaga a le TV a le EFKS ma faapea mai ai, ua aafia tele le auaunaga a le Ekalesia i faiga faapolokiki.
I se saunoaga a Tuilaepa, “O TV lotu uma o loo iai, latou te aumaia le upu o le faatuatua, ma o loo mulimulita’i pea e momoli mai le upu o le ola, ma tāla’iga e faafealofani ai le atunuu ma faanofo filemu ai le atunuu, ae lē o le faatupu vevesi”.
Saunoa Tuilaepa, “O se feau lea e momoli atu i le pulega a le TV EFKS, o loo aafia i faiga faapolokiki aemaise o le tele o le gaogaosa o loo la’u mai ai.”
Na taumafai atu le SGN i se avanoa e faatalanoa ai le faauluuluga o le EFKS mo so latou tali i tuuaiga, peitai, na tā’ua e se tasi na talia mai le telefoni o le ofisa, “E leai se isi e mafai ona tali mai, ua na’o le failautusi le susuga ia Vavatau, peitai, o loo malaga o ia i le taimi nei.”
O pei ona silafia o le TV a le EFKS o loo aafia i le tagi a Tuilaepa, lea ua faaulu atu i le faamasinoga faatasi ai ma le Taitaifono o le Vaega Faaupufai o le FAST le afioga ia Laaulilemalietoa Polataivao Fosi Schmidt, faapea le fofoga o le polokalame ia Paialii Levasa Tapuala Oloapu.
Saunoa Tuilaepa, o le Aso Tofi o le vaiaso nei lea ua atoa iai le 7 o aso talu ona tuuina atu le tusi talosaga a lana loia ia Laaulialemalietoa faapea le EFKS TV poo Tapusoa, ina ia tuuina mai ai ni faamaumauga e tusa ma tuuaiga sa fai i luga o le polokalame Soalaupule.
O tuuaiga o loo finau nei, o le faaaogaina lea o Tuilaepa o tupe “faitau miliona” faapea ai ma tupe sa alu i sikolasipi a lanau fanau, faapea ma le tuuaiga sa totogi e le Malo e aunoa ma se silafia e le Kapeneta, le avatuina lea i fafo o le fanau a Tuilaepa mo togafitiga faasoifua maloloina.
I le mataupu lava lea o le aafia ai o Ofisa Faasalalau i moliaga tau tulafono, o le tausaga 2021 sa molia ai le afioga ia Taulealeausumai Sioeli Alofaifo i le mataupu Contempt of Court poo lafoga e aafia ai le Faamasinoga. I lena mataupu e pei ona faalauiloaina, sa magalo le sui faasalalau
O loo iai foi se tuuaiga poo le lafoga a Tuilaepa e faasaga i le afioga ia Olo Fiti Afoa Vaa’i, o loo iloiloina e leoleo ma le ofisa o le loia sili.
E faauau pea..
- Silia ma le $16,000 le Tau o Meatotino sa Gaoia mai le Maota o le Komesina o Tineimu - December 6, 2023
- 25 Gasegase o le Koviti ua Faamauina e le Matagaluega o Soifua Maloloina - December 6, 2023
- Teena se Poloaiga e Taofia ai le Faatinoga o le Galuega a Afega - December 5, 2023
