Fesiligia ele Palemia le amiotonu

0
85

OFISA SOOUPU – Ua faailoa nei e le Palemia Afioga Tuilaepa Dr. Sailele Malielegaoi e lế tatau ona talia i Samoa nei se tagata ua faaleaogaina lona laisene sa galue ai i atunuu i fafo ae ua toe foi mai i inei faaoga ai.

Saunoa Tuilaepa; “O la’u a mau o le manatu faavae lautele i le tulaga foi lele o le amiotonu, afai o oe o se loia, sa e solitulafono i fafo ma aveese faamalosi ai lou laisene, e le tatau ona toe talia i inei.”

“Auã o le loia ã e solitulafono i fafo e oo mai i inei ua matuã sasao faaola i nai o tatou tagata e faalemalamalama i mea a tama tetele nei a’oa’oina.”

“E le faapea la na ou talanoa atu na’o loia, e aofia ai foi la i totonu suetusi, e aofia ai foi ia foma’i e aofia ai foi inisinia, auã o le vaega uma a lenei e fai a latou faalapotopotoga”

“Afai ae pi’opi’o e le tatau ona faatagaina e omai e galulue i inei, auã o le iuga o mea ia e nonofo foi ma faavalea o tatou tagata.”

“O le faanaunautaiga la ia te a’u, o le puipui o tatou tagata mai le mea lea o le taufaavalea, aemaise le taimi lenei e te mafaufau loa e te sulufa’i i se loia e fai sau moliaga, e tatau ona i ai sau 20 afe, ia se’i vaai la i ai i le totogi taugata.”

“O le isi lea tomai o le matuã taugata, ae nonofo a latou ma faataugata latou. Ia a sau la le loia kuluku foi ia mai fafo, e faataavale faataavale a oe e uma ifõ ua e mole, a’o la e lei faia a le mataupu.”

“O le mea la lea o la’u tautalaga, o le tautalaga faalauaitele i faiga faavae, e ta’u la loia ae aafia ai foi ma foma’i, o suetusi ma inisinia. Auã o le ma’i lea o le lế faamaoni, e le faapea e fitoitonu i se faalapotopotoga e tasi e aofia uma a faalapotopotoga, aemaise a pe a fai ni pisinisi.”

Na ia faopoopo foi e faapea “Ia le tulaga la faaloia, e vaai mamao atu a i o, e faiaina lau mataupu, ae la e fai atu a le loia, o! suipi taua. E le mafai ona fai atu e sese e suipi, aua e te popole ae aumai muamua se 20 afe e faagaioi ai le ta mataupu. Ia na alu loa lea o si toeaina tusi i o i fanau, se’i aumai a se 20 afe, o le mea lea tatou te talosaga ai fai mai le loia e malo. Ia ua faafia na tutupu na mea?”

“O le mataupu malie a o le mataupu lea a Siumu, tigã ona ou fai atu ia Siumu; vaai tou te gau ai. Ia a’o le atamai ia o le loia lea e sau mai fafo; oi e malo. O la ua uma ona fai mai le matou loia ua fo’i mai o i Siamani ma vaai i pepa, na na gau aano ai ia Siumu, pe 200 afe ea ia tala Niu Sila.”

“Auã o le mea matautia lea e tupu, o loia nei lea sa i fafo ma ua tutuli mai i fafo, ona o mai loa lea i inei faasaolo i inei, o la e nofonofo a se tasi toeaina, alu e su le Malo i le mea lea, ia nofonofo foi, alu e su le Malo ua faaletonu ia eleele o le atunuu. E tigã ona ta’u atu e leai ni eleele o le atunuu e aafia, ia a la fai mai tatou o e su le Malo i le mea lea.”

“Manatua la e uma loa, e leai ni tupe a tagata nei, ona toe o loa lea talosaga i fesoasoani a le Malo lea e paketi i lalo o le Faamasinoga. O lona uiga la o le suega o a latou tupe, ona uma ane lea, e o faaoso tagata e su le Malo, ia ona toe omai lea e avatu tupe a le Malo e totogi ai.”

“O le ala la lena e pisi ai le vaega lea e o e, talanoa i ia, talanoa i ai o e su le Malo i mea ia o fanua ia e o le a mamulu atu i tua. E le’o malupuipuia le Favae, ia maua ai ni a latou galuega ona maua ai lea o latou tupe.”

“A’o tupe nei o tupe a tatou, o tatou lafoga.”

“Ua e iloa foi tagata nei e le mãnofonofo, pau a lea o le mea a uma ona mafaufau i lea mea faalelelei, ia ua mafaufau i lea mea faalelei, e le momoe.”

“A’o le tulaga la lena o le uiga o nei mea e tatau a ona fai le amiotonu, mo le puipuiga o tatou tagata. O le ala lena lea sa faavae la i luga o mea na ou iloa i aso la, a’o o’u galue i totonu o le Malo”