Faa-Samoa

Fesiligia e Toelupe le COLA $110 miliona ma le PELEGA $68 miliona a le HRPP

June 18, 2025

1011

Ua fesiligia e le Sui Taitaifono a le Faatuatua i Le Atua Samoa ua tasi le faatupeina o polokalame a le vaega faaupufai e Puipuia Aia Tatau a Tagata (HRPP).

Ua lauiloa i le atunuu le folafolaina o le COLA a le HRPP, lea e faapea mai ai o le a faamatuu atu o le $500 tala i tagatanuu uma o Samoa, e faamamaavega ai i le taugata o le tau o le soifuaga – Cost of Living Allowance.

E $110 miliona tala le tau aofai o lea polokalame e pei ona faamautu mai e le HRPP, lea ua fesiligia ai e le Sui Taitaifono ia Toelupe Poumulinuku Onesemo, ma ia faapea mai, o se folafolaga e pepelo tele, ma e le taunuu.

Saunoa Toelupe, mai le taimi faatoa tulai ai le FAST e taitai le Malo, sa fesiligia e sui o le HRPP poo fea e aumai ai tupe o le a faatinoina ai le poloketi miliona – lea e faamatuu atu ai le $1 miliona i le tausaga mo itumalo palota uma, poo le $51 miliona i le tausaga.

“Na fesiligia matou i le poloketi miliona, ma folafola e le taunuu, ao lea ua faimai i le $110 miliona.. o se pepelo tele lea..”

O le polokalame faalevaiaso, Fofola le Fala ma Tusitala, na fesiligia ai e le sa avea ma le Minisita o Fesootaiga ma Faamatalaga Tekonolosi (MCIT) ia Toelupe, e le gata o le COLA, ae o le faalauiloa a le HRPP i suiga mo le penisione i se tau aofai e $68 miliona tala.

O le poloketi ua faaigoaina o le PELEGA – Pension Ensuring Lasting Empowerment for the Golden Age – ua folafola ai e le HRPP se vaevaega fou mo le penisione a tagata matutua lea ua faapea mai e $200 le faamanuiaga tau tupe e maua i le masina e mo i latou e 61 agai le 64 tausaga o le soifua, ae $300 mo le 65 i le 74 tausaga, ae $400 mo i latou e ausia le 75 tausaga i le 84 tausaga o le soifua, ma le $500 i le masina mo i latou uma ua ausia le 85 tausaga o le soifua.

O le tuualalo a le sa tulai mai i le itumalo o Falealili 1, “Aua tou te olegiaina le atunuu.”

Petai, ua folafolaina e le Taitai a le HRPP, e le’i maea mai ona faalauiloa a latou polokalame autu mo le faamama avega. O le COLA ma le PELEGA, e faaopoopo iai ma nisi polokalame mo le aoaoina o le atunuu (education) ma le tausia o le soifua maloloina (healthcare).

The opposition party says the $110 milion tala COLA and $68 million tala PELEGA are part of a program that will be “focused on retirement, education, healthcare, and sustainable economic development.”

Ao tapena atu le atunuu i le faigapalota tele, ua amata faalauiloa anavatau a vaega faaupufai e folafolaina ai polokalame o le a faatino pe afai e tulai mai i le foe e taitaia le faigamalo a Samoa.

O le Aso 27 (pre-polling) ma le Aso 29 o Aokuso 2025 o le a faia ai le faigapalota tele a Samoa. O le vaiaso o le Aso 7 Iulia – Aso 12 Iulai o le a tatalaina ai le resitala mo sui tauva o le faigapalota.