“O lea ua matau atu i luga o upega o tala feavea’i, ua saini le Minisitā le feagaiga o le Samoa Stock Exchange”.
O le mau lea a le Sui Faipule o Safata 1, le afioga Le’aana Ronnie Posini ao faasolo lana saunoaga i le Tala o le Tupe i le Palemene i le vaiaso ua tea.
Ina ua fesiligia le saunoaga a Leaana i lenei mataupu, ona e lē o aafia i le Tala o le Tupe, sa tali Le’aana, “O lea ou te talanoa faalauaitele mo le manuia lautele o le atunuu, e tatau ona tatou mata’itu.”
Na faauilavea le taitai o le Malo, le tamaitai Palemia le afioga Fiame Naomi Mata’afa, e fesiligia poo iai se faamaoniga na saini se minisita i lea feagaiga.
Sa faamanatu le taitai o le atunuu, “O le maota lenei na o mea moni e talanoaina ai.”
Saunoa Fiame, e leai se mea faapena o tupu, ma e le talia e le Malo faiga faafesui’aiga o tupe ma aseta, e leai foi se faamaoniga na faia e le Malo se mea faapea.
Sa fesiliga e le Fofoga Fetalai le Sui Faipule pe iai ni ana faamaumauga poo ni molimau o lana saunoaga ua saini e le Minisita se feagaiga mo le Samoa Stock Exchange.
Ae tali Leaana, “O tala ma ata o loo vaaia i luga o fesootaiga tele vavave lea pei e mafua ai se talanoa atu, ae afai e le faamaonia lea tulaga toe faafoi mai i inei se faamatalaga.”
Na faatu e le Minisita o Galuega Tetele ma Atinae Eseese, le afioga Olo Afoa Fiti Vaai, le lafo ina ia faaui ese ai saunoaga a le Sui Faipule mai faamaumauga o le fonotaga.
E lei mamao atu na tuuina mai ai se Pepa o Faamatalaga (Press Release) mai le Ofisa o le Palemia, e faailoa mai ai le lē lagolagoina e le Malo o se tapenaga mai Hong Kong ua faaiogaina o le Samoa Stock Exchange.
Sa iai se ata ma faamatalaga o loo vaaia i luga o le api o foliga le Facebook, o loo auai ai le Minisita o Tupe, le afioga Mulipola Anarosa Molioo.
O tua mai o loo lomia ai upu: The establishment ceremony of Samoa Digital Asset Exchange, Samoa Stock Exchange and Oceania Special Economic Zone.
“O le faatuina o le Samoa Digital Asset Exchange, Samoa Stock Exchange ma le Oceania Special Economic Zone.”
Peitai o le Pepa o Faamatalaga sa matuai tetee ai e le Malo ia tapenaga uma ma faapea mai, e lei avea se faatagaga.
E lei faia foi ni suesuega mautu (due diligence) e fetuunai ai se manuia o Samoa, ae o ni aafiaga foi mai nei faamoemoe.
