O le Aso Lua 22 Aperila na tula’i ai Lauititi Tualima, 32 tausaga o Satapuala, i luma o le Faamasinoga Faaitumalo ma ia ioeina le moliaga o le sola ese mai le toese i Tanumalala.
I taualumaga o le Faamasinoga Faaitumalo, na fesiligia ai e le afioga i le Faamasino iā Loau Donald Kerslake le pagota i le tulaga o loo taofia ai o ia.
Na tali Lauititi, o ia o loo nofo i le pa sima, e leai se aluga, ie afu, poo se fala e moe ai.
“E faatasi i le vaiaso ona ou taele, ae faasā fo’i lo’u aiga ona asi atu a”u i le falepuipui.”
Sa fesiligia foi e le Alii Faamasino ‘ia Lauititi poo afea e mae’a ai lona faasalaga, peitai, na tali le itu a leoleo, o le faasalaga o Lauititi e ma’ea i le 2027.
Peitai e 18 tausaga i le toese le faasalaga a le Faamasinoga Maualuga na tuuina atu ia Lauititi mo le soligatulafono o le toso teine, ae faatoa tuli lena faasalaga pe a maea ona moliaga o loo tuli nei mo le tele o isi soligatulafono.
O Lauititi Tualima o se alii pagota ua logologoa lona igoa i le tele o solitulafono ua aafia ai e aofia ai le faamalosi teine i se tamaitai turisi, o le gaoi, talepe fale, ulufale faamalosi, faaoolima ma le sola ese mai le falepuipui.
O le 2015 na ia osofai ai se ulugalii o ni turisi mai Ausetalia sa faamautu i le Lupesina. Sa ia saisai le alii ae faamalosi le tamaitai turisi.
Ua toe tolopo e le Faamasinoga le mataupu a Lauititi mo le Aso 14 Iulai i le tausaga nei se’ia saili mai e leoleo faila ma faamaumauga poo moliaga muamua a Lauititi, e fua iai se faaiuga a le faamasinoga.
I se vaaiga i totonu o le potu faamasino ae le’i amataina le Faamasinoga, e leo tele lava le ataata ma le talatalanoa o Lauititi. E le’i iai ni foliga faanoanoa pe popole foi i lona tula’i ai i luma o le Faamasinoga.
O Lauititi Tualima na sola ese mai le toese i le Aso 22 o Ianuari i le tausaga nei, i le 7 i le afiafi. O le taimi tonu lea sa faatino ai se polokalame e toe fuata’i ai se amataga fou mo i latou o loo tuli faasalaga a latou faasalaga i le toese (rehabilitation program).
E toalima nisi o le aufaigaluega a le toese na faasala e mafua mai i le faatamala o le faatinoga o latou tiute, na mafua ai ona sola ese Lauititi.
E 2 masina o sailia pea e leoleo lenei pagota ua iloa i soligatulafono matuiā ma i’u ai lava ina faasalalau e le Matagaluega o Leoleo ma Falepuipui se taui tupe e $5,000 talā mo soo se isi na te tuuina atu se faamatalaga e uiga ia Lauititi.
Na muamua saili e leoleo Lauititi i Satapuala ma Faleatiu, faapea Mulifanua e tusa ma lipoti ma faamatalaga na aoina mai. Peitai, mulimuli ane o se aiga i le afioaga o Aele na pu’e ai e leoleo Lauititi i le Aso 18 Mati.
O Lauititi e le fou le sola ese mai le falepuipui. O le tausaga 2016 na muai sola ese ai mai le falepuipui i Tafaigata.
O le tausaga 2019 na sosola ese ai Lauititi ma Aniseko Vaelei mai Tanumalala, peitai, e puupuu le la tuuaga ona sa vave ona toe maua e leoleo.
Ina ua tula’i i laua i luma o le Faamasinoga i lena taimi, sa la tuuina atu fo’i i luma o Faamasino le tulaga lava lea e tasi e uiga i le nofo taofia i le pā simā. O le leai o se aluga poo se fala, ma o loo momoe i luga o le simā ma le lē mafai ona taeele i ni aso se tele.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
