Fesiligia e Laauli le Aveeseina o le Tautua Faalelotu mai agavaa o Sui Tauva

0
1290
Sa fesiligia e le sui faipule o Gagaifomauga Numera 3 ia Laaulialemalietoa Leuatea Polataivao Schmidt le Talosaga Tusia (petition) sa sainia e taitai o Ekalesia faapea nisi o le atunuu sa tuuina atu mo le teuteuga o le Tulafono o Faiga Palota.
O le autu o le Talosaga Tusia a faauluuluga o Ekalesia, o loo teena ai le aveesea o monotaga faalelotu mai agavaa a e o loo fia tauva i faigapalota. O le finauga e faapea, ia tumau pea le tautua faalelotu e fai ma se isi auala e faatino ai le monotaga a se matai o loo fia tauva i le faigapalota (definition of monotaga).
O le teuteuga o le Tulafono, e aveeseina ai upu, “poo le faalelotu” – mai le lisi o aiaiga o se  matai o loo fia tauva i le faigapalota.
Ao lei pasia le teuteuga i le aso ananafi, sa faapea mai le faamatalaina o le ‘monotaga’ i totonu o le Tulafono – o se tautua faifaipea a se tagata e faatinoina lea i galuega masani faaleaganuu, poo le faalelotu, poo mea e tutupu, ma ni tulaga masani e ono faamuamua i totonu o se nuu.
Sa faatatau le fesili a Laauli i le Taitaifono a le Komiti Faapalemene sa iloiloina teuteuga o le Tulafono, le afioga ia Nafo’itoa Talaimanu Keti
Saunoa Laauli, “Pau lea o le tulaga lau afioga i le taitaifono, o le a le mea ua le aumaia ai le petition lea o lo’o saini ai ta’ita’i o Ekalesia, le Afioga i le Akiepikopo, Faaao o le EFKS, Faaao o le Metotisi – na tuuina atu i auala aloaia e momoli mai i le maota, ma finagalo e ova atu i le 1000 tagata”.
“Afai ua teena la tou ripoti fai lena i tulaga e talafeagai ai, ae o le teena lea i fafo i o, o finagalo o le atunuu, e maitau atu, ua le faataua finagalo o le atunuu.”
O le tali mai a le Fofoga Fetalai o mataupu faapea e le avatua i le Fono a le Palemene mataupu ia e auala atu i le komiti ma ua maea faia foi iai iloiloga a le komiti ma tuuina mai ai la latou faaiuga o loo i le vaega 5.1 o le Tulafono, lea e aumai ai agavaa o sui tauva (eligibility of candidates).
Ae sa finau atu pea Laauli ma ia faapea atu, “Lau afioga i le Fofoga Fetalai, o a tatou tulafono tumau 57 – e gafatia ai e so’o se tagatanuu o Samoa e momoli mai sona manao i le Maota”.
Sa fesiligia foi e le sui o Gagaifomauga Numera 3 le aveeseina o le tautua faa-ekalesia e masani ai tagatanuu uma, ma o gatasi ma le mau, “O Samoa, e Faavae i Le Atua”.
“Aisea ua aveese ai le faakerisiano?”
Sa ia faailoa le ese o faamatalaga e fai, ese le faatinoga – ona o Samoa e faavae i Le Atua, ae o lea ua aveese mai le faalelotu ma le tulafono sa teuteuina.
O le vaiaso nei o le a aloaia ai le tuuina mai o vaega taitasi na mafua ai lenei talosaga, e faauluuluga o Ekalesia, aemaise o tagata lautele sa lagolagoina lenei mau. O se fonotaga ma tusitala o le a valaauina.

Maina Vai