Ua tula’i mai se mataupu ua fesiligia ai le aiā tatau o tagata o loo galulue i afioaga tu-taulaga, i le mafai ai lea ona resitala i le Lola Palota mo le nuu o Falealupo.
E lata i le 100 suafa ua mae’a ona resitalaina ma tu’uina atu i totonu o le Lola Palota a le Itumalo o Falealupo, o loo lu’iina faaletulafono, e pei ona faamautinoa mai e le Komesina o Faigapalota.
Saunoa le Komesina ia Tuiafelolo Toleafoa John Stanley, e tāpunia le taimi faatapulaa, e tasi le itumalo na faauluina atu lu’i aga’i i tagata palota (voter registration challenge) ma e lata i le 100 i latou o loo faasaga iai lu’i.
O suafa o tagatanuu nei e faitau selau, lea na saunoa iai le afioga ia Tuimaseve Poto Seumanutafa Fiu, o le Sui Tauva a le Faatuatua i Le Atua Samoa ua Tasi.
Sa saunoa Tuimaseve i luga o upega tafailagi i se feiloaiga ma le itumalo, “Ua faitau selau suafa ua i luga o le Lola Palota a Falealupo, ae lē o ni tagata o le itumalo, e lē o nonofo i totonu o le itumalo..”
Na fesili le sui faaolioli, “O se amiotonu ea lea?”
Ae o nisi o finagalo ua lagā i lenei mataupu sa faaalia ai e se tasi o lo’o aafia i le lu’i faaletulafono ua i luma nei o le Faamasinoga. Pau lava le mafuaaga o loo omai ai i Upolu, o galuega, faapea fo’i ma le faaa’ogaina o le fanau.
“E tū’ua loa aoga ma maua taimi avanoa mai galuega, e toe fo’i lava i Falealupo, e lolotu ai, ma fai ai tulaga uma faalenuu..”
O se tasi o lo’o aafia i le lu’i faaletulafono na ia tu’uina mai i luga o upega tafailagi e faapea: “E toeitiiti tofu uma aiga i Falealupo, ma alo ma fanau o loo galulue pe aooga fo’i i Upolu..”
“E leai lava se eseesega o matou lea e galulue atu i Upolu, ma tagatanuu o Falealupo o loo alala ma papaaao i atunuu i fafo.. ae o loo fia palota fo’i mo le itumalo.”
“Afai ua faataga ona lesitala tagatanuu Samoa o loo nofo mau i atunuu i fafo..aisea lā ua fesiligia ai lo matou aia tatau e palota ai mo Falealupo?”
O le tapenaga o le resitala mo le faigapalota e pei ona silafia, sa tatala ai le avanoa e resitala ai i luga o upega tafailagi, ma sa maua lava le fuainumera o tagatanuu Samoa o loo galulue i atunuu i fafo, sa resitala mai ai. Ae tatau lava lā ona toe oo mai i Samoa nei e faatino ai le palota i le Aso 29 Aukuso 2025.
E pei ona faamalamalama e le Komesina o Faigapalota, o le tulafono e tuu avanoa mo so’o se Sui Tauva (Candidate) poo se Tagata Palota fo’i (Voter) e taga’i ai i le Lola Palota a lona itumalo – ma faaulu sana tagi e fesiligia ai se suafa poo ni suafa o loo i totonu o le Lola Palota.
O lea la e tula’i mai ai lu’i ua tuuina atu i le Faamasinoga, e fesiligia ai le agavaa o tagata palota e lata i le 100 i le Lola Palota mo Falealupo.
Saunoa le Komesina, o suafa uma ua resitalaina, sa mae’a lava ona fai iai le galuega ma suesuega (vetting process) a le Ofisa o Fagapalota. Peitai, o le a toe aumai uma i luga ma toe suesueina auiliili, ina ia faamalieina le lu’i ua tuuina mai..”
I le faasologa o aiaiga o le Tulafono, e tatau ona tuuina atu pepa o le lu’i (serve notice) i tagatanuu uma nei e lata i le 100 ua tu’uaia.
Saunoa Tuiafelolo, o le Aso 30 o Iulai e tagofia ai e le Faamasinoga lenei mataupu, ma e ao ona tula’i uma i latou nei e lata i le 100 tagata, e tali atu i le tu’uaiga o loo faapea mai, o i latou e lē o ni tagatanuu o le afioaga o Falealupo.
E lē o mautinoa poo lea tonu le faiga o le a faatino ai e le Faamasinoga Maualuga le faagasologa o lenei mataupu faaletulafono mo le lata i le to’a 100 o le a tula’i ai.
O le Ofisa o Faigapalota sa gafa ma le galuega o le toe resitaraina uma o tagatanuu o Samoa mo le Lola Palota 2025.
E tula’i foi la le Ofisa o Faigapalota e tali atu i le Faamasinoga e tusa ai ma lu’i uma nei.
O le itumalo o Falealupo, e silia ma le 800 le Lola Palota sa iai i le 2021. Ina ua tapunia le resitala mo le palota o le 2025 na toe ausia lava e le Itumalo o Falealupo le 836 o le aofai o lana Lola Palota.
Avanoa Faigaluega
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
