Fautuaina le Faamalosia ona Tula’i Ese se Faigamalo Tausi i Totonu o le 45 Aso

0
746
Ata Pueina: Papaliitele Malietau Malietoa.

O se tasi o mataupu na oo iai suesuega ma fautuaga a le Komisi Suesue o Faigapalota, o le faamalosia lea ona tula’i ese o se Faigamalo Tausi (Caretaker Government) pe a maea le 45 aso mai le aso ua faatino ai se faigapalota tele.

Available only at SSAB! Simply the Best.

O le Faavae o le atunuu tutoatasi o Samoa, o loo faamauina ai, e tatau ona tauaofia le Palemene, i totonu o le 45 aso mai le aso e faatino ai le filifiliga a le atunuu i se faigapalota tele.

“Parliament must convene no later than 45 days after the election”.

O lea vaega o le Faavae, e faamalosia ai ona tauaofia le Palemene e faatautoina Sui Faipule na filifilia e le mamalu o le atunuu i lana faigapalota, ma tulai mai ai se faigamalo fou.

I lenei lava mataupu, o loo fautuaina ai foi e le Komisi Suesue le silasila toto’a o le Palemene, pe talafeagai le faatinoina lea e se Malo Tausi, se Tala i le Tupe, poo nisi lava faaiuga tetele e aafia ai le taitaiga o le atunuu.

E pei ona tulai mai i le faigapalota o le Aso 21 o Aperila 2021, na oo atu lava i le Aso 24 Me – le aso mulimuli e atoa iai le 45 aso talu ona fai le filifiliga a le atunuu – e le’i mafai lava ona tauaofia le Palemene.

I lena lava aso i le tala faasolopito o Samoa, sa faatino ai i lalo o se fale’ie i fafo mai o le Palemene le faatautoina o Sui Faipule filifilia e 26 a le Faatuatua i Le Atua Samoa (FAST) e fai ma Malo fou e taitaia Samoa.

E le galo ia Samoa lena taeao ina ua tapunia mai faitotoa o le Maota Fono ma tali mai le Failautusi o le Fono, ua alu ma le Fofoga Fetalai i lena taimi le ki o le Maota.

O lea e fautuaina ai foi e le Komisi, ina ia silasila toto’a le Palemene poo talafeagai le galue pea o le Fofoga Fetalai pe a faata’ape le Palemene e sauni atu mo faigapalota tetele.

Ae maise o le fesiligia e le Komisi Suesue, poo le a tonu tiute a le Fofoga Fetalai o loo faatinoina ae ua malolo le Palemene e sauni atu mo le filifiliga a le atunuu.

Talaaga

O Aperila o le 2022 sa tofia ai se Komisi Suesue e latou te tapā se finagalo o le atunuu ma tapenaina se lipoti ma ni fautuaga e faaleleia atili ai le faatinoga o faigapalota i totonu o Samoa, ae maise o ni suiga e ono teuteuina ai le Tulafono o Faigapalota a Samoa.

O Iuni o le 2022 sa tuuina mai ai mo le silafia o le atunuu, se lisi o mataupu o le a agai iai suesuega a le Komisi.

Lisi o Mataupu na limataitaia ai suesuega

  1. Palota o tagata Samoa o loo alala i atunuu i fafo
  2. Faatulagaina o le Ofisa Faipalota
  3. Sui o Vaega Faaupufai
  4. Solitulafono ma Faamasinoga
  5. Resitara o Vaega Faaupufai
  6. Agavaa o Sui Tauva
  7. Itumalo Faaleaganuu
  8. Nofoa o Sui Tamaitai
  9. Lola Palota
  10. Ma Nisi Mataupu

O Setema o le 2022 na maea ai faatalatalanoaga ma saunoa mai ai le Taitaifono o le Komisi, o le a tuu faatasia le latou lipoti mo le faaooina atu i totonu o le Palemene ia Novema 2022.

O suesuega a le Komisi o Faigapalota ae maise o a latou fautuaga, e ao ona tuuina mai mo le nofo silafia o le Mamalu o le Atunuu ae maise ē sa auai i faatalanoaga o mataupu na suesueina.

Public Notice